Usa ka onse anyos nga batang lalaki ang gikaon sa buaya didto sa Papua New Guinea samtang ang bata namasol sa sapa uban sa iyang mga ginikanan.
* * *
Kini suma sa balita nga napatik sa National newspaper sa Siloura, Gulf Province, Papua New Guinea. Suma sa taho, ang bata gilabyog sa ikog sa buaya unya giatake ug gikaon.
* * *
Ang mga kamot ug mga tiil sa bata nakit-an sud sa tiyan sa buaya dihang gipatay sab kini ug gihiwa ang tiyan. Ang ulo sa bata, suma sa balita, nakit-an dili kaayo layo sa dapit diin miataki ang buaya.
* * *
Suma sa kapolisan sa Papua New Guinea daghang libud-suroy nga mga buaya sa daplin sa mga sapa sa PNG. Gani, suma sa rekord sa kapolisan, duna nay mga 65 ka tawo ang napatay ug gikaon sa maong mga buaya sukad sa tuig 1958.
* * *
Suma sad sa rekord sa usa ka global database sa Charles Darwin University sa Australia kadtong pag-ataki sa 11 anyos nga bata ikaduha na to nga nahitabo ning tuiga.
* * *
SA LAING BAHIN... Greetings sa atong mga suking magbabasa sa Banat News diha sa North Reclamation Area ug sa mga dapit palibot niini. Salamat sa inyong nagpadayong suporta sa Banat News.