Mayor JVR, gising!!!

Nakadawat ako og mga text messages sayo kagahapon sa buntag nga nagpasalamat nga ato’ng gihisgotan ang kasaypanan sa mga sakop sa Flying Squad nga gimugna ni Talisay City Mayor Johny V. Delos Reyes.

Nakapanglingo-lingo ko nga nagbasa sa mao nga mga text messages kay nagmatuod lang kini sa abuso sa mga sakop sa Flying Squad. Ang usa lagi sa ilang sayop mao ang pagsakay-sakay niana’ng itom nga sakyanan nga walay plate number sa likod.   Tan-awa ninyo ang hulagway sa ilang sakyanan sa pahina 5 sa Banat News karong adlawa. Ikaduha nila nga sayop mao ang pag-parking sa sakyanan tungod gayud sa traffic sign nga “No Stopping Anytime.”

Dili ba sila abusado? Angayan ba sila nga mahimo’ng traffic enforcer? May nabasahan ko nga balita nga gikutlo gikan sa pamahayag ni Mayor Johny V. Delos Reyes.

Tubag kini ni JVR sa Audit Observation Memorandum sa Commission on Audit (COA) nga ang Flying Squad mi-duplicate sa trabaho sa tinuod gayud nga mga traffic enforcers sa Talisay – ang CT-TODA.    Ang CT-TODA maoy katumbas sa CITOM dinhi sa dakbayan sa Sugbo. Gipasabot ni JVR nga gimugna niya ang Flying Squad dili aron mo-duplicate sa trabaho sa mga traffic enforcers sa Talisay.

Matud ni JVR nga ang trabaho diay sa mga sakop sa Flying Squad mao ang pagbadlong sa mga sidewalk vendors aron dili makababag sa agianan sa mga tawo ug sa mga magpataka’g labay sa basura. 

Kun kini man gani ang tinuod, ngano’ng wala ka man makabadlo’ng mayor JVR sa mga sakop sa Flying Squad nga nag-atang-atang og mga sakyanan unahan sa taytayan sa Bulacao?

Bi, tubaga kuno kini Mayor JVR. Siyaro na man usab og kamo’ng mga opisyal sa Talisay wala makabantay nga miabuso na ang mga sakop sa Flying Squad?

Kun paghawan sa aseras ug pagdakop sa magpataka’g labay sa basura ang tahas niini’ng mga tawhana, nganong gitugotan man ninyo nga biyaan ang ilang trabaho ug anha magbarug-barog sa karsada?

Ang amigo nako nga kawani sa Land Transportation Office (LTO) sa Talisay pwerte’ng nakasaway niini’ng mao nga mga sakop sa Flying Squad kay hambugero ra kuno kaayo.  Sila maoy nagtug-an kanako nga kwestyonable nga giisyohan ni LTO-Officer-in-Charge (OIC) Arnel Tancinco og mga Temporary Operators Permit (TOP) kining mao’ng sakop sa Flying Squad.  Ambot, wala ko masayod ngano nga giisyohan ni Arnel Tancinco og TOP kini’ng mga tawhana nga mga “Job Order Employees” ra man unta sila sa Talisay.

Malipay ko nga adunay motabang sa pagpanakop sa mga abusado nga drayber, apan kun ang gitugyanan nga manakop utro pa nga abusado dili na maayo.