Samtang naghinam-hinam tang nagpaabot sa pagbisto sa listahan ni Janet Lim Napoles sunod semana, inanay nang nitumaw ang pasiunang mga ngan gikan sa duha ka tinubdan:
Una, si kanhi senador Ping Lacson nihingan na og pito ka senador ug usa ka sakop sa gabinete sa listahan nga iyang giingon nga naglakip sa 113 ka opisyal--21 ka kanhi ug incumbent nga senador, 90 ka kongresista ug duha ka sakop sa gabinete; ug
Ikaduha, si Benhur Luy, kanhi finance officer ni Napoles sa wa pa mahimong whistleblower sa P10 bilyones nga pork barrel scandal, nga gikatahong nilista og kapin sa 200 ka ngan.
* * *
Wa pay bisan usa ka ngan nga gihisgutan si Justice Secretary de Lima, kinsa maoy gihatagan ni Napoles sa labing uwahi ug gituohan nga mas hingpit nga listahan sa mga nakadawat og suburno. Apan nipasalig si de Lima nga motuman sa supina sa Senate Blue Ribbon Committee pagsumiter sa listahan.
Gipasanginlan si Lacson nga may iyang kaugalingong duwa sa pagpili sa walo ka ngan nga iyang ginganlan: Silang Budget Secretary Butch Abad ug mga senador nga silang Miriam Santiago, Chiz Escudero, Gringo Honasan, Alan Peter Cayetano, Juan Ponce Enrile, Jinggoy Estrada ug Bong Revilla. Duha ra sab ka senador ang ginganlan ni Lacson nga wa maapil sa lista--silang Franklin Drilon ug TG Guingona.
* **
Hilom si Luy bisan siyay nakasumiter sa labing komprehensibong listahan sa niagi pang tuig nga maoy gibasehan sa Ombudsman paghukom nga isang-at ang mga kasong plunder sa Sandiganbayan. Apil sa listahan ni Luy ang mosunod:
Jaime Napoles, bana ni Janet, nga gipasanginlang nakadawat og P200,000 nga komisyon sa proyekto sa Department of Agriculture (DA) niadtong 2005;
Krista Ranillo, giingong uyab ni Kongresista Manny Pacquiao, gipasanginlang nakadawat og awtong Mazda;
Chairperson Zenaida Ducut sa Energy Regulatory Commission (ERC) nga gipasanginlang nag-unang ahente ni Napoles sa House ug Senado;
Mario Lim nga gipasanginlang nakadawat og P345,000 alang sa classroom sa China;
* **
Pauline Labayen, kawani sa buhatan ni Senador Estrada, gipasanginlang nipirma og mga suwat sa DPWH parte sa mga proyekto sa pork barrel;
Catherine May Santos, kawani ni Senador Bongbong Marcos, gipasanginlang nakadawat og P3,000 pagpangompra og lanzones;
Alyas “Sexy†nga nakadawat og P1 milyon nga gasa sa birthday niadtong Marso 16, 2012;
Alyas Kuryente, Alyas Gerera, Alyas Khulit, Alyas Bulaklak, Alyas Bonjing, Alyas Tuna, Alyas Inay, Alyas Tanda, Alyas Dahon, Alyas Pogi, Alyas Jessica Daan ug Alyas Olga Tossan;
Atty. Freddie Villamor, gipasanginlang nidawat sa suburno alang sa Ombudsman niadtong Enero 30, 2006;
Lucy Gomez, gipasanginlang nakadawat og P202,000 alang sa gipalit nga luna; ug Alice Villanueva, gipasanginlang nakadawat og P2 milyones alang sa 20% sa shares sa Commander Shoppers Drug.