EDITORYAL - Dili sinsero nga pangalagad

Ang katawhan gimingaw gayud sa tinuoray’ng serbisyo sa atong mga opisyal ug kawani sa kagamhanan. Kaniadto, ang usa ka tawo nga motrabaho sa gobiyerno, ang anaa sa iyang huna-huna mao gayud ang pagserbisyo sa publiko.

Dako na kaayo og kalainan karong panahona kay ang mga tawo nga mosulod og trabaho sa gobiyerno, maoy anaa sa ila nga huna-huna kun unsaon nga mapa-dato nila pagdali ang ila’ng kaugalingon ug mapaburot ang ilang bulsa sa kuwarta. 

Makita nimo kini kay kadtong mga opisyal ug kawani sa kagamhanan nga gitugyanan unta pagtan-aw kun giayo ba sa pagtrabaho ang mga proyekto sa gobiyerno, ingon sa natulog lang ug gipasagdan ang bati nga trabaho.

Ang mga proyekto nga gipatrabaho sa kagamhanan ngadto sa mga pribado nga kontraktor, sama sa pagsemento ug pag-aspalto sa mga karsada, adunay mga gidistino nga supervisor ang ahensya sa kagamhanan.

Ang pagpalawom sa atong kasapaan nga gihimo gihapon sa mga pribado nga kontraktor gidistinohan usab og supervisor sa City Hall kun ang dakbayan ang migasto sa mao nga proyekto.

Apan gibadlong ba nila ang bati nga trabaho sa mga kontraktor? Wala sila mohimo niini kay tingali nakigkonsabo sila sa mga kontraktor aron dili tumanon ang anaa sa Program of Works and Estimates (POWE) sa tumong nga daku ang ganansya.

Tan-awa ang atong mga karsada nga gipang-aspalto kun unsay dagway? Tan-awa ang kasapaan nga gipalawman kuno sa kontraktor nga mikontrata og milyon-milyon ka pesos? Ang record sa City Hall nahuman ang proyekto apan ang tinuod wala.