Abusado’ng drayber suspensohon

Malipay g’yud ko kun tinud-on sa kadagkoan sa Land Transportation Office (LTO) nga suspensohon na nila ang lisensya niadtong mga drayber nga nadakpan sa makadaghan na nga higayon – sa ato pa badlongon.

Dugay na kaayo ako nga nagbalik-balik nga pinaagi sa estrikto nga pagpatuman sa lagda nga gilatid sa Section 27 (b) sa Republic Act 4136, ang mga drayber mahadlok na nga mohimo’g salaod.

Matud ni LTO-7 Acting Regional Director Arnel Tancinco nga sugdan na nila pagpatuman ang mao nga lagda. Maayo unta og dili kay kutob ra sa tumoy sa dila ni Tancinco ang mao’ng pamahayag.

Unsa ba ang gilatid sa balaod? “Whenever during any twelve-month period a driver shall have been convicted at least three times for the violations of any provisions of this (law) or of any regulations issued by the director or any municipal or city ordinance relating to motor vehicle traffic not in conflict with any of the provisions of this Act, the (LTO) director may revoke or suspend the license of such driver for a period not exceeding two years.”

Bi, kinsa kaha nga drayber ang dili mahadlok nga ipatuman kaniya kini’ng mao nga balaod kun madakpan sa makadaghan nga higayon? Kun estriktohon lagi pagpatuman kini nga balaod, sigurado ko nga mokalma ang mga abusado nga drayber. Apan kun estriktohon na ang pagpatuman sa mao nga balaod, kinahanglan nga paspasan usab ang pagpanakop sa mga masalaypon nga drayber aron sila magkinto ug dili moabuso. Kaniadtong Biyernes, usa ka tawo nga nag-drive og motorsiklo pwerte nakahinambog, ikis-ikis nga pagpadagan ug gasuot-suot sa daghan nga mga sakyanan. Pinahandag-handag pa ang pagpadagan.

Nakaingon lagi ko nga kun LTO deputized agent pa ko gihapon, tudloan g’yud unta nako og leksyon ang mao nga drayber. Ambot ba, ngano nga wala na man g’yud manakop ang mga LTO road enforcers.

 Gikapoyan na kaha sila sa ilang trabaho? Ambot og unsa kaha’y bation ni Arnel Tancinco nga makakita sa daghang mga abusado nga drayber.

Nasayod ko nga kada adlaw makakita g’yud si Arnel og mga malapason sa balaod sa pagpamaneho’g sakyanan kay anaa gud siya nagpuyo sa Barangay Buhisan. Kun ako maoy opisyal sa LTO papaspasan g’yud nako og panakop ang mga badlongong drayber. Unsaon pagka panton sa mga badlongon nga drayber nga wala may pagpanakop.

Kay gipahunong man ang mga sakop sa Task Force Alpha nga mao unta ang kusog kaayo manakop, hala paspasi ninyo ang pagpanakop. Wala na g’yuy enforcement karon ang LTO dinhi sa ato.