Ang kalibotan ingon sa nagsusapinday na

Daghan kaayo’ng mga tawo sa kalibotan nga walay pagpakabana ug maoy hinungdan sa climate change.

Dinhi sa ato ang klaro kaayo’ng walay pagpakabana mao ang mga operator sa mga sakyanan nga nagbuga og itom kaayo’ng aso nga makadaut sa panglawas sa katawhan ug sa kalikopan.

Tinuod adunay balaod bahin sa “smoke belching” apan wala kini makasumpo sa abusado kaayong tag-iya og mga sakyanan nga mobuga og itom nga aso ug makalanag sa mga tawo.

Adunay mga vendors nga gihimo’ng labayanan sa ilang mga basura nga plastik ang mga kanal.

Mga mangunguling nga hasta ang mahalong matang sa kahoy sama sa tugas, lawaan, ug uban pa, iapil nila sa pagpuril ug dauban  aron ikabaligya.

Mga illegal logger nga abtik kaayo’ng mopuril sa kalasangan ug uban pa nga abusado sa kinaiyahan nga maoy  hinungdan sa pagkausab sa klima sa panahon nga wala nay kasulbaran.

Kini’ng tanan katumanan lamang sa giingon sa Biblia nga  ang kahimtang sa kalibotan karon sama sa usa ka tawo nga hubog nga nagsusapinday nga padulong na sa iyang hingpit  nga  pagkatumba  o  katapusan.

* * *

Daghan baya kaayo’ng  nalipay sa gitanyag karon sa kagamhanan sa Cebu City nga mohatag og P5 mil nga pension sa mga single parent.

Ambot pila kaha ka libo ang makapahimus niini karon ug sa umaabot nga katuigan.

Sama sa senior citizen, matag tuig mosaka ang  gidaghanon niini kay ang taga lungsod, anhi na sa siyudad magparehestro isip botante. Daghan usab ang  nagtuo nga tungod  niining bag-o nga ordinansa daghan kaayo’ng babaye nga gusto lang magpaanak bisan dili minyo kay hinabangan man sila og P5 mil sa gobyerno.

* * *

Pintok kaayo ang hagit nila ni Senador Bong Revilla ug Jingoy Estrada ngadto ni Kalihim Leila De Lima nga ipabutyag  ang ngalan sa ubang magbabalaod nga giingon’g nalambigit usab sa PDAF scam.

  Gawas nga ibutyag, gusto usab sila si Revilla ug Estrada nga tak-opan na ang kiha nga gipasaka batok kanila.

Kining mga tawhana giisip nga mga gamhanan dinhi sa nasud kay kaantigo sila mohulga sa ilang mga labaw aron  makalingkawas sa mga dagko’ng salaod nga ilang nabuhat ngadto sa katawhan.

Matud pa ni Deputy Ombudsman for the Visayas Pelagio Apostol nga kun dili prisohon ang mga kawatan sa kuwarta sa gobiyerno, mao ra kini ang mout-ot sa ekonomiya sa nasud. ([email protected])