EDITORYAL – Pa-rehistro mo’g sayo!

Karong Martes, Mayo 6, pagabuksan na sa Commission on Elections ang biometrics system registration sa mga botante. Apil usab niini ang pagparehistro sa mga bag-ong botante ug mga transferee. Maayo unta og maghinay-hinay na og parehistro kadtong gusto mobotar sa umaabot nga eleksyon karong 2016.

Ang kanunay man gud nga mahitabo sa mga miaging tuig kay maghuwat ang tanan nga hapit na ang deadline usa pa magpa-rehistro. Ang resulta, tag-as kaayo ang mga linya sa Comelec ug usahay mag-ilogay na sa linya. Kay daghan man ang dugayan moparehistro, daghan usab ang ma-disenfranchise o dili na hinuon makabotar kay wala marehistro kay naabtan na sa deadline.

Ang biometrics system naglangkob sa pagkuha sa hulagway, tamla ug pirma sa usa ka botante. Ang Republic Act 10367 maoy nagamando nga ang tanang botante kinahanglan gayud mo-apil sa biometrics registration aron maka-botar sa eleksyon sa 2016. Ang dili moparehistro tangtangon sa voters list.

Ang registration nga magsugod karong Martes molungtad hangtod October 30, 2015 o mga desi-siyete ka buwan. Taas kaayo nga panahon para maka rehistro nga hapsay ug pahimutang. Wala’y rason nga dili makaparehistro ang tanang gusto mobotar sa umaabot nga eleksyon.

Kana kung dili lagi magdugay dugay ug maghuwat nga last minute na magparehistro. Busa, pa rehistro na mo’g sayo. Dili na gyud sala sa Comelec kung adunay mga dili marehistro ug dili na makabotar kay langayan.