Ang pagpaputi sa ngipon

Nindot hinoon tan-awon nga magbaton kita kanunay nga puti ang atong ngipon. Mao nga kadaghanan nangandoy gyud niini busa bisa’g unsa na lang ang gihimo para mamintin ang kaputi sa ngipon. Apan wa kita masayud nga ang atong gihimo nakadaut hinoon sa imong ngipon. Sama niini pananglitan;

Grabeng nakuskos sa pagpanutbras

Kun permi ka manutbras ug grabe naka nusnos sa ngipon, gamit ang gahi og brisol o toothbrush, makahilis kini sa enamel nga nagsilbing proteksyon sa ngipon mo. Maimpeksyon ang ngipon hasta ang imong lagos madaut. Kinahanglan maoy gamiton mo ang humokon nga toothbrush, dili ikuskos nga pababag kundi patuyokon paibabaw paubos, aron malimpyohan pag-ayo nga di makagnan ang punoan sa ngipon.

Pagkaon og mga asidic nga pagkaon

Ang pagkahingaon anang mga aslomon makatangtang sab sa enamel o proteksyon sa ngipon mo. Kun mawa na ang enamel nga maoy nakapasinaw sa ngipon, dili na gayud kini mabalik sa normal. Inanay magabok ug dali na mamansahan ug mahugaw na kini tan-awon. Mapagan nga madaut hasta ang mga ugat sa lagos mo. Mao nga usahay mabati mo na ang kangilo sa aslom ug bugnaw. Ang softdrinks grabe sad kaasidic, kundi gyud kalikayan human moinom, maglimugmog dayon og tubig. Pwede sad mag-straw aron di kayo mahumol sa softdrinks ang ngipon mo. Ang pagpanigarilyo nga may daghan kemikal toksins, makadaut sad ni nga masunog ang enamel nga malain ang kolor nga makapagabok sa imong ngipon.

Angay nato masayran nga ang himsog nga ngipon, pabilin kining magsinaw tungod sa enamel. Ang puting ngipon magkadalag kini samtang magkaedaran. Ang puti kaayong ngipon, dili sinaw ug gabukon nga daling mamansahan. Aron mamintin ang kahimsog sa ngipon, mahimo nga humag kaon mo, mag-dental floss ug manutbras og humokon nga pagaanan lang. Gamit ayaw anang fluoride kundi kanang herbal toothpaste. Ighuman, maglimugmog kag high-alkaline nga fluid sama sa ph9 water, spirulina Filipina, lactobacillus ug uban pa, aron way dautang bakterya mopuyo sa ngipon. Pwede sad panagsa maglimugmog og nilaga nga dahon sa bayabas nga tinimplahan og diyotay nga organic nga asin.