Sa kanunay na natong gihisgutan dinhi ug sa atong tulomanon sa radio, sa Senior Citizens Hour sa dyRC matag Sabado, alas 5 hangtud alas 6 sa gabii, dunay mga kapunongan sa senior citizens sa pipila ka barangay nga wala kapahimulos sa one percent nga gahin alang unta kanila.
Kini, tungod lang gyud kay ang kapitan ug ang chapter president sa mga senior citizen dili magkasabut (ambut ngano), dili, ingnon ta, maka-see eye to eye. In fact, dunay mga barangay nga ang kapitan magtukod og kaugalingong pundok sa mga senior citizen iatbang sa pikas nga pundok. Dili maayong tan-awon. Sa mga tambay pa: Bad to look at. Labi na, sugod sa miaging eleksyon, naduhigan pag-ayo sa politika ang mga kapunongan sa senior citizens sa dakbayan – samot ka very bad to look at. Ambut, as ABC president, duna ba kahay mahimo si Konsehal Philip Zafra ini nga identified man kaayo na siya with the mayor?
Anyway, let us to wait and see, matud pa.
Hinoon, dili kini mao ang nahitabo sa ubang mga barangay, sama sa Busay. Matud ni Rey Mojica, president sa Busay Senior Citizens Organization, Inc., wala silay problema uban ni Brgy Captain Amilo G. Lopez … ug sa panahon pa ni Yodie Sanchez.
Mao unta kini ang atmosphere sa tanang mga barangay as far as the senior citizens are concerned, regardless kun Team Rama o BOPK ba ang Kapitan.
Ang Busay chapter adunay kapin sa 500 ka sakop, majority taga-bukid, apan sa ilang regular nga tigum matag katapusang Domingo sa bulan, sayo kaayo ang taga-bukid. Ang attendance: 200 to 300 ang manambong. Maayo kaayo, itandi sa ubang mga pundok dinhi sa patag.
Ilang monthly dues, P30; burial – P6,000 tibuok tuig. Cash assistance: hospitalization – P10,000; burial – P20,000. Updated ang ilang Financial Statement, tanang gasto supported sa mga vouchers. Sa ato pa, transparent gyud.
Pagdugang sa ilang panalapi, every now and then, magpa-bingo o magpa-raffle sila. Ug sa ato nang giingon, tungod kay wala silay problema with Kapitan Lopez, nagpahimulos sila sa one percent nga gahin gikan sa barangay – samtang ang uban naglaway intawon.
Busa nakapamalit sila’g mga lingkoranan ug mga cabinet. Ingonman, sound system. Kauban ni Rey Mojica nga mga opisyales, sila si:
Eugenio Lopez (ambut ig-unsa ni kanhi Vice President Eugenio Lopez), vice president; Edith Catabas, secretary; Maximino Hentapan, treasurer, Saturnino Inso, auditor. More power kaninyong tanan.