Di ni unang higayon nga may sakop sa Kongreso nga niawhag og imbestigasyon sa eskandaluso nga kahinay ug kamahal sa internet connection sa Pilipinas. Sa wa pa motingog si Senador Bam Aquino karong semanaha, unang nibarug si Kongresista Raymond Palatino sa Kabataan Partylist niadtong Septiyembre 2010 pagkondenar sa pagdaugdaog sa mga konsumidor ug pagpaburot sa ginansiya sa higanteng mga kompaniya sa telepono.
Tungod ba kaha kay sakop siya sa hingaway nga militanteng mga pundok, way nahitabo sa awhag ni Palatino. Giisnab siya sa telcos ug bisan sa iyang kaubanan sa Kongreso. Mas duol sa luwag si Aquino busa di mahitabong bungulbungolan lang siya. Apan kadudahan pa kun makatandog ba sa higanteng mga negosyante.
* * *
Sa namantala nga Ookia Net Index sa unang mga buwan karong tuiga, nasakpan ang Pilipinas nga maoy labing hinay og internet connection sa tanang nasud sa Southeast Asia. Mas paspas pang internet sa atong silingang nasud sa Myanmar nga wa pa hingpit makalingkawas gikan sa diktadurang militar ug bag-o pa lang kaayong nibukas sa iyang ganghaan sa langyaw nga mga kompaniya.
Palihug panggunit sa imong lingkoranan, basaha ning kinatibuk-an nga lista sa internet speed sa Southeast Asia ug hilak: Singapore, 65 mbps; Thailand, 17.9 mbps; Vietnam, 13.7 mbps; Cambodia, 5.7 mbps; Malaysia, 5.4 mbps; Brunei, 5.3 mbps; Myanmar, 5.2 mbps; Laos, 4.3 mbps; Indonesia, 4.2 mbps; ug Pilipinas, 3.5 mbps.
* * *
Mas makahasol ang mga numerong gipagawas ni Senador Aquino. Iyang gitandi ang kamahal sa bayad sa hinay nga internet connection sa Pilipinas ngadto sa kabarato sa mas paspas nga internet sa silingang mga nasud:
Kasagaran sa mga Pilipinhon nagbayad og P999 matag buwan para sa 3 mbps;
Nga labihang mahala kun itandi sa 12 mbps sa Thailand nga gipabayran sa kompaniyang True Internet og P1,100 ang buwan; ug
Mas mahal kun itandi sa 15 mbps sa Singapore nga gipabayran lang sa Singtel, labing dako nilang kompaniya sa telepono, og P1,312 ang buwan.
* * *
Giawhag ni Aquino ang National Telecommunications Commission (NTC) pagbadlong sa pangabuso sa telcos. Way lalis nga pulos puti og kiting ang nagpulipuling mga liderato sa NTC. Apan bisan sa ilang katalawan, nakamando nang NTC paglaslas sa bayranan sa voice calls ug ipasikad sa matag pulso di sa gipatuman karon nga matag gutlo. Wa hinuon mapatuman kay kanunay’ng gipaboran ang telcos sa ilang pagdangop sa mga hukmanan.
Mas maayong maghiusa silang Aquino, Palatino ug ubang kongresista ug senador sa pagpanday og balaudnon pagbaraw sa kahakog sa telcos. Maayo sang hunghongan ni Aquino ang iyang paryente sa Malakanyang nga di magpalabi og bayad sa dakong utang kabubut-on sa telcos nga nakaamot sa kampanya.