Mosulti na si Janet Lim Napoles sa iyang mga nahibaw-an sa pork barrel scam apan aduna kini mga kondisyon. Kini ang gisulti mismo ni justice secretary Leila de lima kinsa nakigsulti kang Napoles sulod sa lima ka oras didto sa Ospital ng Makati sa wala pa ang gikatakda nga operasyon sa naulahi.
Gusto ni Napoles nga mahimo siyang state witness. Sigun sa body language ni secretary Delima uyon siyang mahimong testigo sa Estado ang giingong utok sa pork barrel scam.
Sa akong gihimong radyo survey kaniadtong Abril 22 sa tulumanong Saksi Evening Edition sa DySS Super Radyo Cebu 61 ka respondents nga gikan sa Visayas ug Mindanao ang misanong ug mitubag sa pangutana: UYON KA BA NGA HIMOONG STATE WITNESS SI JANET LIM-NAPOLES.
Ang survey gihimo sulod sa 45 minutos gikan sa alas 7:45 sa gabii hangtod na sa pagka alas 8:00 sa gabii. Ang milapas sa cut off wala na nato apila sa pag-ihap. Ang survey gipaagi sa text messaging. Aron maseguro nga wala magbalik-balik sa pag-text ang respondents migamit ta og cell nga dali rang makaila sa numero kun gikan ba kini sa mao gihapong respondent. Pero kun ang respondents migamit og laing numero sa cell aron siya makasalmot pagbalik wala na tay kahimanan sa pag-ila niini.
Ang milapas sa cut off atong mailhan tungod kay makita man nato sa message sa cell ang time received. Ang mga respondents gipangayoan usab sa ilang rason sa pag-uyon ug dili pag-uyon. Gipangayoan usab sila sa ilang mga pangalan ug dapit nga gipuy-an apan wala na nato kini apila sa pagkuwenta. Ang ato nga gikuha mao ra gayod ang ilang pag-uyon ug dili pag-uyon. Aron dili maimpluwensiyahan ang mga respondents diha na ako mopadayag sa akong baruganan human nako makuha ang ilang mga tubag. Mao kini ang resulta.
Sa 61 ka mga respondents 25 kanila o 41 percent ang miuyon nga himoong state witness si Napoles samtang 30 kanila o 49 percent ang wala muoyon nga himoong state witness si Napoles samtang ang unom wala motubag sa pangutana. Kun ibasi nato sa survey, mas daghan ang dili uyon nga himoong state witness si Napoles. Bisan ako dili uyon nga himoong state witness si Napoles tungod niining mosunod: Una dili siya kwalipikado. Sigun sa Rules of Court ang mahimong state witness kadto lamang makita nga dili kaayo sad-an sa kaso.
Si Napoles giingon nga siya ang utok sa pork barrel scam busa siya ang pinakasad-an sa tanan ug dili siya ang pinakaminus og sala.
Ikaduha, kun ang nangawat og lubi kay gigutom kay walay ikapalit og pagkaon gipriso ug gisilotan bisan sa ka gamay sa kantidad sa pagkaon nga iyang gikawat si Napoles pa kaha nga binilyon gayod ang giingon nga gikuha niini sa panudlanan pa gayod sa atong kagamhanan.
Ikatulo, dili na ta makaseguro nga ang ipangsulti ni Napoles mao ba gayod ang kamatuoran tungod sa posibilidad nga gigamit lamang siya sa kagamhanan ni Pangulong Noynoy Aquino aron mapiangan ang mga kontra niini sa politika ug ang mahitabo mahimo na unya siyang selective sa iyang pangtestigohan.