Unsay buhaton sa buyer kon ang property nga iyang gi-instalment nabayran na

Dear Atty. Divine,

Aduna ko’y pangutana may labot sa property nga among na-inherit gikan sa among amahan. Tulo mi ka magsuon ug ang akong papa namatay na duha ka tuig na ang nakalabay. Dunay balay ug yuta ang among mama ug papa ug mao kana karon ang among gustong bahinon. Nagkasabot ming mga igsuon uban sa akong mama nga amo na lang ibaligya ang among bahin ngadto sa among kamaguwangan kay siya may nagpuyo karon sa maong balay kauban sa among inahan. Basi sa among nasabutan nga bayran mi sa among igsuon sa among share sud sa usa ka tuig ug nagpirmahanay gyud mi sa maong kasabutan. Karon miabot na og kapin sa tuig wa pa mi niya bayri sa tibuok nga kantidad sa among share. Matud niya nga andam siyang mobayad niining tanan kun mo-execute mi og usab og kasabutan nga pinirmahan namong tanan. Ang akong pangutana attorney kun kinahanglan pa ba kaming mopirma og laing kasabutan nga human na man kami nagpirmahanay kaniadto? Angayan ba namong sundon ang gusto sa among igsuon?

Hinaut nga imo ming magiyahan kun unsay angayan namong buhaton. Salamat ug more power to your column. — Lovely

Dear Lovely,

Kun ang inyong gipirmahan kaniadto usa lang ka kasabutan nga paliton sa imong igsuon ang maong property pinaagi sa data-data nga pagbayad, karon nga gusto na siyang mobayad sa kinatibuk-an kinahanglan gyud kamo nga mopirma og laing dokumento, dili lang kasabutan ang inyong pirmahan ning higayona kondili mo-execute mo og Extra Judicial Partition with Sale in favor sa imong igsuon nga mipalit niini. Wa ko masayud kun unsa nga matang sa dokumento ang inyong gipirmahan kaniadto apan kun ang usa ka property paliton gani pinaagi sa instalment o data-data nga pagbayad, ang dokumento nga angayang pirmahan niini mao kanang gitawag og Contract to Sell nga diin aduna kini terms and conditions nga iyang bayran sud sa pipila ka buwan o tuig ang maong property, ug sa higayon nga ma-fully paid na ang maong property, ang nagbaligya kon seller mo-execute na sab og Contract of Sale or Deed of Absolute Sale in favor sa buyer. Kining maong dokumento mao na ang gamiton sa buyer kon nagpalit sa property sa pagpa-transfer ngadto sa iyang pangan sa maong kabtangan nga iyang napalit. Busa, kanang hangyo sa imong igsuon nga mopirma mo og laing kasabutan wa kanay problema ug ning higayona ang inyong pirmahan mao na kanang Extra Judicial Partition with Sale. Hinaut nga akong natubag ang imong mga pangutana. Thanks and God Bless. — Atty. Divine

Kun ikaw adunay pangutana may kalabutan sa problemang legal, ipadala lang sa Legal Corner sa Banat News sa V. Gullas Street, Cebu City or email sa [email protected] ug akong tubagon ang inyong pangutana pinaagi sa akong column matag adlaw’ng Miyerkules ug Domingo.