EDITORYAL - Sakripisyo pagtuman sa panaad

Dunay kaugalingong interpretasyon ang tawo pagpakita sa iyang pagtuo ngadto sa Labaw'ng Makagagahum. Mahimo kining mauyonan sa uban ug mahimo usab nga dili. Gani duna pay mosaway apan duna 'say gusto nga mosuon niini.

Niadtong Biyernes Santo, dunay daghang nagkalain-laing tinuohan ug pamaagi sa pagtuman sa panaad. Dunay mikatkat sa mga hilit kaayong bukid ug kalasangan aron manguha og mga medicinal herbs ug dagon-dagon.

Dunay nagpalansang sa krus, dunay nagpalatos ug nagsamad-samad sa ilang kaugalingon ug ang uban  nagpuasa,  kay mao kini ilang interpretasyon sa pagsakripisyo sa pagtuong makapahugas kini sa ilang tinagoang mga sala.

Ang uban usab gusto lang mosakripisyo tungod kay duna silay pangayuon ngadto sa Kahitas-an ug ang uban misakripisyo aron tumanon ang ilang mga panaad agi og pagpasalamat sa mga grasya nga ilang nadawat.

Ang Simbahan kusganong mipadayag nga wala kini gitudlo sa pagtulun-an sa Bibliya ang pagpasakit sa kaugalingon, labaw nga wala nila kini giduso aron maoy sundon sa tanan.

Ang nakaayo lang, wala kini babagi o wala idili sa atong kaparian. Mismo si Cebu Archbishop Jose Palma miingon nga walay katungod ang si bisan kinsa nga babagan ang usa ka tawo nga dunay kaugalingong pamaagi pagpakita sa iyang pagtuo.

Mahinungdanon kaayo ang pagsinabtanay sa usa'g-usa ilabi na karong panahon sa Kwaresma. Ipadaplin lang una ang mga deperensya ug hatagan og panahon ang kaugalingon nga mapun-an ang espirituhanong panginahanglan ug pakig-uli sa Kahitas-an.

Bahala na kung unsay pamaagi, basta di makasakit sa uban kay ang pagsinabtanay ug pagminahalay sa usa'g-usa mao may labing mahinungdanong unod nga nahasulat sa Balaang Basahon.