Virgin coconut oil

Daghan nang nasayod niini apan wala kaayo kini mahatagi og pagtagad o maalinggati kun unsa kini kamahinungdanon sa kahimsog sa panglawas. Daghan na usab ang gihimong mga impormasyon pinaagi sa libro o magasin sa medical o naturotherapy. Gani duna  nay mga pagtuon nga mipamatuod sa katakos niini nga makatabang sa pagbaton og maayong panglawas.

Ang lubi o coconut, ginganlan kini og 'Tree of Life'. Tungod kay halos tanan sa iyang pagkatanom o punoan, wala'y mausik gikan sa dahon, bunga, punoan ug ubang bahin ini, naghatag og daghang benepisyo sa kinabuhi, panginabuhi ug kahimsog sa panglawas. May mga nagkalainlain nang produkto gikan sa lubi nga anaa na sa merkado sama sa virgin coconut oil.

Matud sa mga doktor, makadaut kuno ang saturated fats. Tinuod kana kun kini gikan sa pagkaon og karne. Apan ang mono-unsaturated fats nga naa sa virgin coco oil, mas makatabang kini sa pagbalanse sa gikinahanglang kolesterol ug mopalig-on usab sa sistima sa imyun (immune system) nga mopakgang batok sa ikadaut sa panglawas. Dili kini medisina hinimo sa mga sentetik kemikals. Usa kini ka natural nga pagkaon o herb nga isabay sa atong pagdayet.

Kun naa mo sa probinsya nga dunay daghang lubi, mas maayo kamo nay maghimo o mag proseso ini. Magpili ka lang og sagay nga lubi, kanang kina-unhang bunga sa bulig. Kudkora ug kuhaa ang gata ini isulod sa garapon ,takobi unya ibutang sa cooler sa refrigerator, dili sa freezer. Monitora hangtud ikatulong adlaw unya kun may makita kang tin-aw nga likido, kuhaa unya salaa.

Ighuman duna kanay cold processed nga virgin coco oil. Ibalhin kini sa sudlanan nga bildo nga lagom di kanang tin-aw, aron di mahayagan. Usa ngadto sa duha ka kutsara, igo na nga idugang alang sa imong inadlaw nga pagkaon. Obserbahe lang kun makauyon ang lawas mo. Pero kun may masinati kang lain ang tiyan, natural kana tungod kay ang imong digestive system hinay o luya, gumikan kana sa istilo sa pagkaon mo. Hinuon, naa na karoy daghang mga natural nga remedy ana, gani ang uban ato nang gituki sa nangaging mga isyu.