Buslot sa mga higante

Bisan nagpabilin nga maoy labing dato nga tawo sa tibuok kalibotan, nahulga na karon ang gingharian ni Bill Gates sa Microsoft. Bag-ong higante nga mga kompaniya naghupot og mas masaaron nga ugma. Nilampos si Gates sa paghatod sa personal computers ngadto sa kabalayan, nga wa mahimo ni anhing Steve Jobs sa Apple, apan daghang buslot ang iyang pagduma sa rebolusyon sa komunikasyon.

Ambot tungod ba sa kadako na sa natumpi niyang katigayonan pagdominar sa operating system sa PC, nabuta si Gates sa saad sa mas dakong kalibotan nga nagpaabot unta sa iyang liderato. Parang Gates, atol sa kinapungkayan sa kalamposan sa Microsoft, libre ang internet, wa siyang kakita og kahigayonan pagdugang sa iyang ginansiya.

* * *

Nihamok na karong Gates ang hiktin niyang panglantaw. Sa labing unang higayon sa niaging semana naapsan na sa kita sa internet ang nagbuntaog nga dominasyon sa telebisyon sa advertisements. Mas unang gilubong sa internet ang kita sa mga pamantalaan, radyo ug ubang tradisyonal nga media.

Laing gisalikway ni Gates mao ang kapuslanan sa browser pagdugang sa kita sa Microsoft. Maong naunhan siya sa Netscape. Nga dali ra hinuong napapas tungod sa kalawom sa iyang pitaka ug kaagresibo batok sa mga kumpetinsiya. Gisalikway sab ni Gates ang kuwarta sa search. Maong naunhan siya sa Google. Nga malampusong nisukol sa tanan niyang panghasi.

* * *

Lahi ni Gates nga nibugnaw sa mga inhinyero sa Microsoft pagbag-o sa orihinal nga code nga iyang gihimo aron magkasinabtanay ang tanang PC, silang Larry Page ug Sergey Brin mapaubsanon nga nitahan sa karaan nilang code sa search ngadto sa mas maayong code sa tinuoray nga mga siyentipiko nga nipalambo sa Google.

Apan silang Page ug Brin, sama ni Gates, may ila sang mga buslot. Tungod ba kaha sa kadako na sa ilang kita sa search, wa dasiga sa Google ang mga inhinyero nga nihimo og daghan uyamot nga mga sugyot sa pagpabarug sa ilang kaugalingong social media network.

* * *

Para gud nilang Page ug Brin, ang labing dakong gimbuhaton sa Google mao ang pag-organisar sa tanang kasayuran sa kalibotan. Kumbinsido sila nga kun matuman nilang tahas, wa nay pangitaon pa ang binilyon ka internet users.

Apan lahi ang tan-aw sa mas batan-ong si Mark Zuckerberg: Mas ganahan ang katawhan nga makiglambigit ug mahibawo sa kalihokan sa ilang mga paryente, higala ug kaila. Maong nahulga silang Page ug Brin sa buwag nga internet sa Facebook nga gitak-opan ni Zuckerberg gikan sa Google apan giablihan alang sa Microsoft. Napakyas ang mga pagsuway sa Google pagpangopya, nga labing bag-o mao ang Google+. Samang gibugalbugalan na sab karon ang Microsoft kay nagsugod na og panghatag sa iyang Word, Excel ug ubang apps. Sama sa Google.

 [email protected]