Makapadayon na ang kagamhanan sa pagpang-apud-apod og mga contraceptives ngadto sa katawhan aron mapugngan ang pagtubo pag-ayo sa populasyon sa nasud.
Gitataw sa Supreme Court nga konstitusyonal ang Reproductive Health (RH) Law nga gisaway pag-ayo sa kadagkoan sa simbahan kay kuno maisip nga usa ka krimen ang pagpugong nga matawo ang bata gikan sa tagoangkan sa inahan.
Natural, managlahi g'yud ang baruganan sa kadagkoan sa simbahan nga nagbagotbot kay wala sila mahiuyon sa hukom sa Supreme Court. Nagngisi 'sab hinoon ang mga opisyal sa kagamhanan kay pabor man kanila ang disisyon.
Gusto sa kadagkoan sa simbahan nga kun momabdos ang usa ka babaye, apil kadtong resulta sa kinawat-kawat nga kalipay, pakatawhon g'yud ang bata.
Samtang kini ang baruganan sa simbahan wala sila'y gihimo sa mata'g higayon nga adunay makit-an nga puya nga ipanglabay lang sa ilang inahan.
Gani usa ka puya ang gibilin ra sa iyang inahan ibabaw sa altar didto sa simbahan sa Birhen sa Regla sa dakbayan sa Lapu-Lapu.
Kun ang mga magtiayon pasagdaan ra nga magsigi og panganak, daku kaayo ang sakripisyo nga mahimo ngadto sa ilang kabataan nga dili nila kahatagan og pag-atiman, apil na ang pagpakaon kanila.
Lahi ang pagpugong sa pagmabdos kay sa pagpakuha sa bata nga gisabak nga maoy dako'ng salaod nga gilatid na sa atong balaod.