Unsay mahitabo sa property sa ulitawo kun siya maminyo na?

Dear Atty. Divine

Duna ko’y mga real properties nga napalit nako karon nga single pa ko. Apan nagplano ko nga magminyo karong tuiga. Ang akong pangutana attorney kun maminyo ko mamahimo bang common property uban sa akong asawa ang akong napalit nga kabtangan? Gusto nako nga ihatag sa akong nanay ug tatay ang usa ka luna nga akong napalit mamahimo ba kini nakong buhaton? Unsa may akong buhaton aron mabalhin sa pangan sa akong mga ginikanan ang ownership sa usa ka luna nga gusto nakong ihatag nila? Hinaut nga imo kong magiyahan kun unsay angay nako nga buhaton. Daghang Salamat . —Rolly

Dear Rolly,

Kun wa mo’y pirmahan nga pre-nuptial agreement or marriage settlements sa imong hinigugma sa dili pa kamo magpakasal, ang mo-govern sa inyong property relations sa higayon nga kamo magpakasal mao ang system of Absolute Community of Property. Ubos sa regime sa Absolute Community, ang tanang kabtangan nga gipanag-iya sa bana o asawa atol sa ilang panagminyo ug ang mga kabtangan nga ilang mapalit atol sa ilang kaminyuon mamahimong common property nilang duha (Article 91, Family Code of the Philippines). Buot ipasabot nga kanang property nga imong gipanag-iya karon nga ulitawo ka pa kun magminyo ka mamahimo na kanang property ninyong magtiayon. Hinuon duna kini mga exceptions nga diin ang maong property dili mamahimong common property sa magtiayon kun ang maong property naggikan niining mosunod: 1) property acquired during the marriage by gratuitous title by either spouse, and the fruits as well as the income thereof, if any, unless it is expressly provided by the donor, testator or grantor that they shall form part of the community property; 2) property for personal and exclusive use of either spouse except jewelries, which shall form part of the spouses’ community property; 3) property acquired before the marriage by either spouse who has legitimate descendants by a former marriage, and the fruits as well as the income, if any, of such property (Article 92, Family Code of the Philippines). Samtang kalabot sa imong pangutana kun mamahimo bang ihatag sa imong mga ginikanan ang usa ka luna nga imong gipanag-iya mamahimo kana nimong buhaton ilabi na karon nga ulitawo ka pa. Mamahimo kang mo-execute og Deed of Donation in favor sa imong mga ginikanan sa property nga gusto nimong ihatag kanila aron mabalhin ang ownership niini. Kun imo kining idonar samtang minyo ka na, gikinahanglan na ang pagtugot niini sa imong asawa ug kinahanglan nga mopirma sab unya ang imong asawa sa maong Deed of Donation. Hinaut nga akong natubag ang imong mga pangutana. Daghang Salamat ug God Bless. —Atty. Divine

Alang sa inyong pangutana, ipadala lang sa Legal Corner sa Banat News sa V. Gullas Street, Cebu City or email sa [email protected]. ug akong tubagon ang inyong mga pangutana matag adlaw’ng Miyerkules ug Domingo pinaagi sa akong column.