Nagmalamposon ang pagsaulog sa ika-69 nga kasumaran sa Talisay Landing niadtong Marso 26, 2014.
Apan labaw nang nagmalamposon ang Balik Baroto sa Talisay bisan adunay nagtinunto nga mga opisyal sa lungsod sa Talisay aron paglawgaw niining maong kalihukan alang sa mga mananagat nga gi-organisar ni Kuya Boy Odilao.
Sa nag-inangat pa ang Talisay Landing, aktibo usab nga nagpahigayon og mga pagpangandam si Odilao alang sa Balik Baroto nga gi-recognize sa kagamhanan sa Talisay isip opisyal nga kalihukan nga tipik sa Talisay Landing.
Gani, sa opisyal nga advertisement sa Talisay nga migawas sa The Freeman sa Marso 26, gibutang man sa ubos nga bahin sa usa ka pahinang advertisement ang Balik Baroto.
Apan makahihibulong kaayo nga ang suporta sa kagamhanan sa Talisay alang sa pagkaon sa mga organizers ug mga nangapil sa Balik Baroto contest wala maabot sa Marso 26.
Ug ang kahibudngan, adunay empleyado sa Talisay City Hall nga nanawag sa grupo ni Odilao sa petsa 27 ug nangutana asa ipahatod ang mga pagkaon. Sa pagsusi pa, ang skedyul sa taga-Talisay City Hall nga Balik Baroto sa Marso 28 ug 29.
Dugang pakisusi nasayran sa grupo ni Odilao nga ang taga-Talisay nagbase sa sulat gikan sa buhatan ni Gob. Hilario Davide III kalabot sa petsa sa Balik Baroto nga nakabutang ang Marso 28 ug 29. Si Odilao mitug-an kanako nga sa kadaghan sa mga tawo nga iyang gika-meeting kalabot sa Balik Baroto nga Marso 25 ug 26 ang petsa nga iyang gihatag alang sa kalihukan, makuli unta kining masayop. Gani, iyang naka-meeting si Mayor Johnny delos Reyes, information officer Vince Monterde, usa ka gihinganlan og Paypa, pipila ka konsehal.
Nakatimaho ko og sabotahe niini.
Adunay mga yabag diha sa Talisay City Hall nga gustong molawgaw sa Balik Baroto.
Nakadungog ra ba ko nga aduna untay ipahigayon nga “sangka sa bugsay†apan wala idayon tungod kay mas organisado ang Balik Baroto. Apan unsa may ipasabot niining sangka sa bugsay? Binunalay sa bugsay? Kun mao kini, bayolente nga kalihukan kini, sa title pa lang daan.
Pero taym pa, asa naman paingon ang budget sa Balik Baroto gikan sa Talisay City government nga wala man madawat ni Odilao? Si Odilao nangompra man og pagkaon gikan sa kaugalingon niyang bulsa unya miklaro na nga dili siya mangayo og refund gikan sa Talisay. Basin gituyo ninyo og lawgaw ang petsa aron mabulsa ninyo ang budget. Klaroha ninyo na, aron dili mo manga-Ombudsman.
Laing pagtuo nga gituyo kini sa pipila ka mga opisyal sa Talisay nga malawgaw ang Balik Baroto tungod kay gi-adopt man kini isip programa ni Gob. Davide.
Apan dili na lang ko anang politika. Ang akong tuyo mao ang pagpangita hain ang budget paingon nga wala man magamit alang sa katuyoan sa Balik Baroto.