Luya ug masulub-on nga nibangon sa sayong buntag si Mayor Mariano Martinez sa San Remigio usa ka adlaw human sa bagyong Yolanda. Nasuhid na niya ang dakong bahin sa lungsod nga kaagian na human nihinay ang hangin ug uwan. Way nakaandam niya sa labing lapad nga kadaot sa kabalayan, umahan, hayopan ug panginabuhi sa mga molupyo.
Labing bug-at nga nakapayungyong sa iyang pagtimbakuwas mao ang kabalaka kun makabarug pa ba ang iyang lungsod? Atubangan sa nagbuntaog nga mga panginahanglan sa mga molupyo, asa man siya magsugod? Basa ang tibuok niyang munisipyo kay natukas ang atop. Nihangad siya sa langit ug hilom nga nangaliya og timaan sa paglaom.
* * *
Gisugat siya og kawani ug gipahibawo nga nagpaabot na niya ang mga kaslunon. Kay sa wa pa ang bagyo may natakda nga di usa kun dili duha gyod ka kasal nianang adlawa. Mabalak-ong nitan-aw si Martinez sa iyang gisul-ob: Ukay-ukay nga purol ug kamisin nga mao ray nahibiling uga.
Ang unang paresan wa magsapayan sa sapot sa mayor. Nangayo sila og pagsabot nga kinahanglang hinayunon ang kasal nga dugay nang natakda. Gihunghongan pang mayor pagkahuman sa kasal nga bisan wa sila’y hikay imbitado siya sa burger reception sa fastfood chain sa silingang Dakbayan sa Bogo nga nakaikyas sa labing bangis nga hangin sa bagyo.
* * *
Mas andam ang ikaduhang paresan. May generator ang ilang caterer. Wa kabalibad dihang gipugos pagdayon sa hikay bisan alang lang sa 20 ka bisita nga mao ray nakatunga. Bisan way kawani sa caterer nga nakatrabaho kay pulos biktima sa bagyo ug nihangyo nga unahon pag-atiman ang ilang pamilya.
Maong ang caterer maoy nagluto sa mga putahe nga salin sa bagyo, maoy ni-ayum-ayom sa mga lamesa ug lingkoranan nga wa ipadpad sa hangin ug maoy nisilbi sa pagkaon ngadto sa kinasal ug mga bisita. Di kaayo sadya apan nahingpit ang reception dihang nakaabot ang wedding cake nga way usang nahibawo diin kuhaa sa caterer.
* * *
Inanay nga napapas ang kaluya ug kabalaka ni Martinez. Gipulihan sa determinasyon sa mga kinasal ug ilang kaparyentihan ug kahigalaan. Nga taliwa sa nangahapay nga kabalayan ug kakahoyan, maisugon nga nipili sa pagpuyo sa ilang kinabuhi ug, bisan sa kangiob sa umaabot, paghimo sa sunod lakang.
Di sayon ang pagpabarug pagbalik sa San Remigio. Di mahibalik sa usa lang ka pamilok ang mga panginabuhi sa mga molupyo. Apan mas masaligon na si Martinez. Naayo ug napintalan nang munisipyo ug may nakumbinser na siyang motabang pagpabarug sa kabalayan. Salamat sa tabang sa pribadong sektor, Kapitolyo sa Sugbo ug nasudnong gobiyerno. Ug sa mga namugos nga magpakasal nga maoy nakahaling pagbalik sa iyang paglaom human sa labing bangis nga katalagman.
* * *