Angay una nga legalisahon sa LTFRB ang P8 nga pletihan sa PUJ nga gilegalisar lang sa mga drayber sa PUJ sa ilang kaugalingon, una sila mangayo og P10 nga minimum nga pletihan sa PUJ.
Kay hangtud karon nagpabilin pa gihapon nga P7.50 ang legal nga minimum nga pletihan sa PUJ apan gitulis sa mga driver ang P.50 gikan sa ilang pasahero pinaagi sa di na pagsukli og P.50 sa P8 nga itunol sa pasahero , sa pasangil nga way sensiyo.
Karon gusto na usab sa mga driver nga himoong P10 ang plitehan, nga kun mosugot ang LTFRB niini labing makapabug-at sa mga pasahero.
Wa gani legalisaha sa LTFRB ang P8 nga kasamtangang gisingil sa mga driver gikan sa ilang pasahero, ang P10 na ba hinuon?
* * *
Di mosugot ang mga magbabalaod nga libkason ang bank secrecy law kay makapaidlas kuno sa mga kuwartahan nga negosyante.
Sila ra usab ang mitolerar aron nga di makabayad og hustong buhis ang maong mga negosyante,
Ang katarungan ni BIR Commissioner Kim Henares sa pagpalibkas sa maong balaod mao nga way lipod-lipod nga masayran sa BIR ang kantidad sa deposito sa bangko sa tax evader.
Apan mikisi-kisi ang mga magbabalaod ug gipasangil lang ngadto sa mga dagkong kapitalista nga kuno moidlas ug dili na modeposito og kuwarta sa bangko.
Ang honest nga tawo di mahadlok kun pila ka bilyon ka pesos ang iyang kuwarta sa bangko ilabi na kun siya relihiyosong mibayad sa iyang buhis ngadto sa gobiyerno.
Ang mahadlok masayran kun pila ang ilang deposito sa bangko, mao kadtong mga tax evader.
Ayaw ko’g ingna nga hastang mga magbabalaod otro sab nga tax evader.
* * *
Ang gibana-bana sa Ang Espada nga naniltil ang Malaysian jet sa ilawom sa dagat, gikonpirmar gyud sa primero ministro sa Malaysia. Tua kuno mosawom sa 4,000 kapin ka metros nga gilawmon sa dagat ang maong jet nga gisakyan sa 239 ka pasahero ug tripulante.
Ang tanang mga sakop sa pamilya ug paryente sa mga biktima namugos na sa gobyerno ug kompaniya sa eroplano sa Malaysia nga pakit-on sila og ebidensya.
Hinuon kun tinuod kini, way kapuslanan ang mga barko ug eroplano nga nangita niini, kundi ang labing epektibo nga mokuha og mga ebidensya sa ilawom sa dagat mao ang mga submarino.