Sulod sa taas nga panahon kanunay nga ubos ang gidaghanon sa mga nakapasar sa Bar examinations. Wala mahibulong niini ang Korte Suprema?
Maingon ba nato nga ang kaubos sa gidaghanon sa mga makapasar sa Bar examinations timailhan sa kaubos sa kalidad sa edukasyon sa mga tunghaan nga nagtanyag og kursong abogasya? O ba kaha ang mga Bar examiners mahilig lang mangutana sa mga examinees niadtong mga pangutana nga wala nila mahibaw-i kay gibati sa mga examiners nga mas utokan sila kay sa mga examinees.
Ang Korte Suprema mipahibawo nga ilang gipaubsan ang passing rate sa 2013 Bar examinations tungod kay kun wala pa dili makaabot og usa ka libo ang makapasar niini.
Kun wala pa ipaubos ngadto sa 73 por cento ang passing rate gikan sa 75 por cento anaa lamang unta kuno sa 600 kapin ang nakapasar sa 2013 nga Bar examinations.
Kun gusto sa Korte Suprema nga ipreserbar ang kataas sa integridad ug ang kalisod sa Bar examinations nganong paubsan man niini ang iyang passing rate? Tumong ug tuyo ba sa pagpaubos sa passing rate sa Bar examinations ang pagpataas sa gidaghanon sa mga makapasar? O ang pagtabang sa pipila ka mga kaila sa Korte Suprema nga makapasar.
Ning panahon sa mga eskandalo ug mga skam, dili nato malikayan nga anaa kining maong pangutana. Gani aduna pay laing pangutana ang akong higala. Siya nangutana kun gitagsa-tagsa ba gyod kaha sa pagkorek sa mga examiners ang kapin sa lima ka libo ka mga notebooks sa mga examinees? Wala ba lang kaha kuno to botikawa sa examiners ang mga notebooks nga ilang korekan?
Sa pagka tinuod lisod gayod ang Bar examinations kay bisan og nagtuo ka nang nakapasar tungod sa imong kaugalingong evaluation sa imong tubag sa mga pangutana mahagbong gihapon ka. Unsa pa kaha kun nagtuo kang hagbong ka.