Party-list groups apil sa pork barrel scam

Bag-o lang nahibaw-an sa Commission on Audit nga adunay bag-ong pork barrel scam nga nagkantidad og P515 milyones nga naglambigit sa ahensiya sa kagamhanan nga ubos sa Office of the President.

Sumala pa sa balita sa Philippine STAR nga unang higayon kining klaseng binuang sa pork barrel nga nakaabot gyud sa Malacañang nga naglambigit gyud sa National Commission on Muslim Filipinos nga gipanguluhan ni kanhi election commissioner Mehol Sadai.

Mao gihapon, si Senador Juan Ponce Enrile nanguna sa tanang mga magbabalaod nga giingong naka-allocate og sobra sa P514 milyones  ngadto sa NCMF niadtong 2012. Ang NCMF ubos sa pagsuperbisar sa buhatan ni Pres. Noynoy Aquino.

Ang nahisgutang pundo giingong nawataswatas ug mipaingon sa 18 ka mga foundations ug non-government organizations diin uban niini gidumala sa giingong utok sa pork barrel scam nga si Janet Lim-Napoles.

Duha ka butang ang nakapa-interes kanako ning maong balita. Una, adunay Sugboanon nga kongresista nga nalambigit niining maong bag-ong binuang sa pork barrel. Sumala sa balita nga si TUCP party-list Rep. Raymond Democrito Mendoza nakahatag og P14 milyones sa usa sa mga NGO nga Kaagapay. Laing 17 ka mga kongresista nakahatag usab og dagkong kantidad sa pundo sa maong NGO.

Ikaduha, sa tanto nakong ihap-ihap sa mga nalambigit nga mga kongresista, ang akong nadiskubrehan mao ang kadaghan sa mga party-list groups nga nalambigit usab diay sa binuang sa pork barrel.

Ning maong bag-ong nadiskubre sa COA, nakaingon ko nga sa kadagko sa kantidad nga nalambigit, ang makaluluoy mao ang kaigsoonang mga Muslim nga gigamit sa panguwarta sa mga magbabalaod pinaagi sa pork barrel.

Kay kun gigamit pa sa saktong gamitan kining kuwartaha, daghang mga Muslim ang mabulahan kay mahatagan og livelihood program. Kasagaran sa atong mga igsuong Muslim mga negosyante ug kugihang mga investor nga nagkinahanglan og pag-abag sa kagamhanan.

Apan ning maong nadiskubrehang binuang, pila ka Muslim sa nasud ang naapektahan tungod kay wala makaabot kanila ang tabang unta sa kagamhanan alang kanila.

Ang luod paminawon mao ang pagkalambigit sa daghang mga party-list groups sa eskandalo sa pork barrel.

Dili ko maka-imagine sa padayon nga pagpangilad niining mga party-list groups ngadto sa katawhang Pilipino nga sila kuno nagrepresentar sa “marginalized sector” sa katilingban.

Kay wala man masusi sa Commission on Elections unsa nga marginalized sector ang ilang girepresentahan, midaghan ang mga party-list groups nga ang nominee niini wala gani magpuyo sa kahimtang sa girepresentahan niining sektor.

Mipakpak kita sa 2010 ug 2012 nga eleksiyon kay nalimpyohan ang party-list pinaagi sa pag-disqualify sa Comelec sa mga party-list groups nga nakitang loyal kang kanhi Pres. Gloria Arroyo diin ang iyang anak ang nagrepresentar sa mga sikyu bisan dili siya sikyu; adunay uban nga dili mananagat o mag-uuma nga nagrepresentar sa mga mananagat o mag-uuma.

Apan kun mobasa kamo sa balita sa Philippine STAR, manglimbawot inyong balhibo sa kadaghan sa mga party-list groups nga nakig-abin diay nilang Enrile ug Napoles aron kawaton ang kuwarta nga alang unta sa mga tawo.

Ning bag-ong nadiskobre sa COA, makaingon ko nga “hopeless” na gyud ning kaso sa Pilipinas kun hisgutan nato ang pagwagtang sa korupsiyon.

Tan-awa ninyo, mura kita og gibayaw sa langit sa pagkapili ni Pres. Aquino niadtong 2010 kay lagi ang Daang Matuwid maoy tubag sa dakong suliran nga gisagobang sa nasud mugna niining taas nga kaso sa korapsiyon sa gobyerno.  Apan unsay nahitabo, nagpadayon hinuon ang kinawatay sa pork barrel, unya gigamit pa gyud ang ahensiya nga ubos sa superbisyon ni Pres. Noynoy.

Wala’y seguro nga kanang gipang-expose sa COA mga binuang lamang kana sa ubang ahensiya, apan unsa na gyud kaha kun nalambigit kanang mga dagkong opisyal sa administrasyon?

Kusog kaayo manulisok ang Malacañang sa mga tawong gilambigit og mga kasong korapsiyon. Apan pananglit og mahibaw-an nga sila sa Malacañang ang nalambigit niini, kinsa man kaha ang motulisok nila?

Sama pananglit anang isyu sa National Bureau of Investigation diin silang deputy directors Reynaldo Esmeralda ug Ruben Lasala gitaktak sa katungdanan kay lagi maoy gipasanginlan nga maoy nakigtabi kang Napoles pipila ka adlaw sa wala pa kini dakpa.

Apan ang tinudlo ni Noynoy sa DOJ nga si Sec. Leila de Lima mobarog gyud nga taktakon silang duha bisan ang duha andam mobarog nga ang mga suod ni de Lima ang nakigsuod kang Napoles pipila ka adlaw sa wala pa kini dakpa.

Ning maong administrasyon, makaingon kita, sa suod lang. Kay kun dili ka mo-amen sa administrasyon, panguros na lang daan!