Nilikoy bang media?
Kun nakigsuod si Janet Lim-Napoles, ang gipasanginlan nga utok sa P10 bilyones nga pork barrel scandal, sa mga artista, mga negosyante, mga politiko ug dagkong mga opisyal sa gobyerno, di mahitabo nga gilaktawan niya ang labing inila nga mga sakop sa media. Kining nagngutngot nga pagduda nadasonan dihang naapil ang tulo ka sakop sa media sa mga gipasanginlan nga nakadawat sa pork barrel sa mga senador ug mga kongresista.
Pasiunang mga timaan nagpakita hinuon nga, sama sa gamhanang mga politiko, lisod imbestigahon ang mga sakop sa media: Duha ra sa tulo ang nanganlan, way bisan usa nga gisuspenso sa ilang organisasyon ug ang usa gi-absuwelto nang daan sa wa pa kasugdi og imbestigar.
* * *
Unang nitumaw ang mga ngan sa mga magsisibya sa mga dokumento sa P1.7 bilyones nga pork barrel sa 83 ka mga senador ug mga kongresista nga nipaagi sa ilang pundo sa gipanag-iya sa gobiyerno nga National Agribusiness Corp. (Nabcor) nga ubos sa Department of Agriculture (DA).
Wa mahisguti ang mga sakop sa media sa mas unang mga dokumento sa pagwaldas sa pork barrel pinaagi sa Technology Resource Center (TRC) ug sa peke nga non-government organizations (NGOs). May sukaranan hinuon ang kabalaka nga ang unang tulo di maoy kataposang mga sakop sa media nga maduhig sa eskandalo.
* * *
Sukwahi sa mga dokumento sa mga transaksiyon sa TRC ug NGOs nga nahukngay na sa National Bureau of Investigation (NBI) ug Department of Justice (DOJ), ang mga dokumento nga nihingan sa mga sakop sa media gidiretso pagsang-at sa niboluntaryo nga whistleblowers sa Nabcor ngadto sa buhatan ni Ombudsman Conchita Carpio-Morales.
Bisan nalaktawan, si Justice Secretary Leila de Lima nisaad sa pagpasaka og mga kasong kriminal batok sa mga sakop sa media, bisan di sila mga kawani sa gobyerno, kun kapamatud-an nga niapil og burot ang ilang mga bolsa sa kabahin sa pork barrel nga gikan sa buhis nga siningtan ug hinagoan sa katawhan.
* * *
Hinaot nga ang mosunod nga giya makatabang sa mga pakisusi sa pundo sa "advertising expenses" nga giingong nadawat sa mga sakop sa media:
“Kun tinuod nga bayad sa advertising expenses, ang mga tseke nga tag-P245,335 nga giingong nadawat nilang Erwin Tulfo ug Melo del Prado ug P2 milyones nga tseke nga giingong nadawat sa wa nganli nga magsisibya sa radyo ug telebisyon gidiretso unta ngadto sa ilang mga sibyaanan ug may pormal untang kontrata nga gipirmahan;
“ Mapatin-aw ang giingong pagdawat sa mga magsisibya sa tseke kun nang-raket isip account executives, nga lisod tuohan tungod sa ilang ka-inila ug sa kadagko sa ilang mga kompaniya; ug
“Timaan nga nilikoy ang mga magsisibya kun nikalit lang og hilom sa ilang atake sa Nabcor niadtong 2009.
- Latest
