Sabon ug shampoo

Aniay laing world news diin nakadawat na sad ang Pilipinas og laing distinction. Matud pa niini nga sa tanang Asiano ang Pinoy ug Pinay ra ang “dili mabuhi” kun wala’y sabon ug shampoo.

* * *

Mao diay nga inig switch on ta sa tv, mogawas dayon ang commercial sa sabon ug shampoo. Medyo sum-ol na ang maong mga commercial apan saon man nga naa diha ang kinabuhi sa tv network nga mihatag kanato og kalipay pinaagi sa ilang mura’g bato balani nga teleserye.

* **

Suma pa sa balita dili mahimo nga dili makapanabon ug makapanyampo ang Pinoy ug kada adlaw, labi na kadtong nanarbaho. Gani dihay usa ka empleyada sa usa ka pribadong opisina nga mogahin og mas dakong budget alang sa sabon (dili panglabada) ug shampoo.

* * *

Ang mga tv commercials, matud pa sa usa ka newsfeature writer, maoy nakapaikag sa atong mga girls ug boys sa pagpanyampo. Naa kunoy usa ka kolehiyala nga nakasag-ulo sa tanang shampoo brands nga gi-advertise sa tv. Apan usa ra niini ang iyang gi-steady.

* * *

TV commercials sad gihapon ang mitabang og palambo sa sabon pangkaligo diin gitawag sa uban nga “sabon humot” or “beauty soap.” Naay usa ka brand sa sabon humot nga suportado sa health authorities tungod sa health drive niini.

* * *

SA LAING BAHIN...Tungod kay ang pagpanabon ug pagpanyampo makaayo man sa lawas ug personalidad sa tawo, angay suportahan ang maong naandang gawi...Daghang salamat sa mga magbabasa og Banat News sakay sa mga barko nga nagbiyahian sa nagkadaiyang dapit.