EDITORYAL - Palusot nga sakit?
Ngano man gayud nga ang mga tawo, ilabi na kadtong mga sikat, nga napriso o nasakpan nga nibuhat og daotan masakit man lang og kalit?
Susama sa giingon nga mastermind sa pork barrel scam nga si Janet Lim-Napoles. Nagpakiluoy si Napoles sa korte didto sa Makati nga tugotan siya nga magpa-admit sa usa ka pribadong ospital kay aduna kini uterine myoma. Gusto ni Napoles nga ma-admit siya sa St. Luke's aron magpa-opera. Samtang didto sa korte, naghupo-hupo si Napoles sa kasakit ug gani, gidad-an pa siya og hot water bag.
Dili gusto ni Napoles nga operahan sa mga doktor sa gobiyerno kay kuno, lain-lain ang mga findings sa kada government hospital nga misusi kaniya.
Wa man hinuon nagkuwang ang gobiyerno sa pagpa-check up niya. Ang findings sa mga government doctors kay wala'y angay ikabalaka sa kondisyon ni Napoles sa pagkakaron. Dili kuno kinahanglan nga ipa-confine siya ug wala pud siya nagkinahanglan og operasyon diha-diha dayon.
Mao siguro nga di ganahan si Napoles sa mga ospital sa gobiyerno. Wa man gud siguro niya magustohi ang findings sa mga doktor nga wa siya magkinahanglan og operasyon ug dili sab siya kinahanglang ipa-admit.
Pito pa lang ka buwan sukad mi-surrender si Napoles sa Agusto sa miaging tuig. Ug sukad nga gi-detain na kini siya, daghan na kaayo siyang gimu'o nga sakit. Diha'y mireklamo siya bahin sa iyang diabetes, kidney stones, ug karon, uterine myoma na sab.
Di man sa ingon nga sadista ug dili ta maluoy niya. Makaduda lang nga pito ka buwan sukad siya ma-detain, nagkalainlain nang sakit ang iyang gimu'o kunohay ug mamili pa siya og doktor ug sa ospital nga motan-aw niya.
Dili kaha palusot lang ni tanan aron dili kaayo maglisod si Napoles samtang na-detain kini?
- Latest
