Nasuwayan na g’yud nako ang bag-ong imbento nga kahimanan ni Engr. Joselito Z. Arenas nga makapakusog pagdagan sa sakyanan.
Una nako nga gipabutangan og gadget mao ang akong motorsiklo. Sa wala pa ko moadto sa balay ni Engr. Arenas, gi-testing usa nako pagpadagan ang akong motor.
Kusog modagan ang akong motor. Apan dihang gitauran na sa gamay kaayo nga gadget nga diha gibutang sa alambre sa sparkplug, nabantayan nako ang kausaban.
Mosutoy na pagdagan ang akong motor. Kaniadto, hinay nga motungas ang akong motor paingon sa Marco Polo Hotel apan dihang natauran na, mora na og nagpanikad.
Gidala nako ang akong awto ngadto ni Engr. Arenas kaniadtong Lunes sa gabii. Ang akong sakyanan kusog modagan apan ang gusto nako nga makadaginot unta og gasolina.
Human matauri og upat ka “gadget,†akong gipaandar. Sus, mora’g abtik kaayo nga moandar. Wala na ko mo-testing pa sa pagpadagan kay klaro man kaayo nga nausab ang inandaran sa makina.
Ang menor nga andar sa makina mikusog na mao nga akong gi-adjust. Kay nagdali man ko, misirit dayon ko agi sa Natalio Bacalso Avenue ngadto na sa V. Rama Avenue.
Pagtungas nako sa Barangay Busay, diha nako namatikdi nga nadugangan g’yud ang iyang power. Ambot kaha ang gasolina kun tinuod ba nga makadaginot.
Kining ako, dili kini pagbulatik ni Engr. Arenas kay ang tinuod, bayad man ko sa pagpataud sa gadget. Gitug-an lang nako kini dinhi kay tinuod man ‘sab g’yud nga mikusog ang dagan sa akong duha ka sakyanan.
Ang kotse gani ni Wen Celen, kanang kulumnista sa Ang Espada dinhi sa Banat News, grabe’ng kusoga modagan. Diha’y higayon nga nasundan nako, akong gigukod sa wala pa ko nagpataud, pastilan aso na lang ang gibilin nako didto sa SRP.
Pero karon nga nagpataud na ‘sab ko, siyaro’g makabentaha pa, gawas kun ang gitaud ni Engr. Arenas sa akong kotse bati ug nindot ang kang Wen Celen.
Salamat daan Engr. Arenas kun tinuod nga makadaginot ta sa gasolina kay pastilang mahala na sa fuel karon uy. Kun magsigi ka’g gamit sa awto, mogasto ka og kapin sa P6,000 ang buwan.
* * *
Mi-text diay kanako si Tommy Osmeña nga didto pa sa Los Angeles, California kagahapon. Nahuman na kuno ang iyang subli nga medical check-up didto sa M. D. Andersons Cancer Center ug giingnan siya sa mga doktor nga hingpit na g’yud nga nawala ang iyang kanser sa pantog.
Maayo kini nga balita sa mga dumadapig ni Tommy nga ang ilang idolo hingpit na nga naayo sa kanser.