Kahadlok sa wa’y kasigurohan
Kapin usa ka semana na ug mas daghang pangutana kaysa tubag ang nitumaw sa pagkahanaw sa flight MH370 sa Malaysian Airlines. Ug samtang nagkadugay, nagkanipis ang kahigayonan nga makit-an pang buhi ang 239 ka pasahero ug tripulante sa maong eroplano. Nikabat na sa 25 ka nasud ang nagtinabangay aron sa pagpangita sa eroplano. Likod sa high-tech nga mga ekipo, banggiitang mga tawo ug kataas sa kasinatian sa mga organisasyon nga nitabang sa pagpangita sa maong eroplano, way tataw nga tubag ang grupo kung asa na ang nahanaw nga eroplano. Daghang mga pagduda ang nitumaw kabahin sa tinuod nga gidangatan sa maong abyon.
Bisan ang mga eksperto sa aviation, di’ makatubag nganong nawa’ sa komunikasyon ang eroplano kaadlawon sa Marso 8. Apan basehan ang data nga gipagawas sa naghimo sa makina sa maong eroplano nga Rolls Royce nagpakita nga nagamit pa ang makina sa eroplano duha ka oras human ni mawa’ sa radar system sa ground command. Kung nag-crash ang eroplano, imposible ning wa’ mobuto sa kawanangan ug imposibleng wa’y makit-ang tipaka gikan sa eroplano nga adunay gitas-on nga 209 feet ug gilapdon nga 200 feet. Bisan ang mga eksperto naglibog unsay tubag sa mga pangutana. Kung gi-hi-jack ang eroplano nganong wa’y nitumaw nga responsable sa maong insidente? Kung ang mga terorista ang utok sa maong insidente, nganong wa’y nitumaw nga grupo nga niangkon nga sila ang nihimo ini.
Sa panahon nga halos ang tanang mga pangutana di’ na mahimong matubag sa mga eksperto sa tabang sa mga high-tech nga mga ekipo, di’ halayong magduda na ‘ta nga basin gikuha sa laing pwersa nga layo sa atong kapasidad, mas taas sa atong mga ekipo ug mas adunay katakos sa pagbalhin sa rota gikan unta sa nahauna niyang destinasyon. Sa mga punto nga di’ na matugkad sa tawhanong katakos ang tanang panghitabo—magsugod na ‘ta sa pagdawat nga basin adunay mga pwersa nga mas lig-on ug gamhanan pa sa atong pagkatawo nga responsable sa maong pagkahanaw. Karon, di’ mapapas sa huna-huna sa mga eksperto nga basin adunay mga tawo nga mas taas pa ang kapasidad itandi sa mga yanong tawo ang nikawat o nitago sa maong abyon.
Di’ ni ang unang higayon nga adunay mga katingalahang butang nga nahitabo. Adunay mga insidente sa kasaysayan nga nagpangita lang gihapon og linaw ug mas klarong tubag. Dinhi sa Pilipinas dakong tanghaga ang pagpatay kang senador Ninoy Aquino niadtong 1983. Bisan kun niasumir ang iyang kapikas sa labing taas nga pwesto sa gobyerno niadtong 1986 ug karon ang ilang anak ang anaa sa katungdanan, wa’ lang gihapon masulbad ug matubag ang pangutana kinsa ang nagpatay ug nagpapatay ni Ninoy. Kutob lang sa pagduda ang mga tawo sa utok sa krimen apan di’ ni igo aron mahatagan og hustisya ang labing dakong krimen nga nahitabo sa bag-ong kasaysayan sa nasud.
Sa Amerika, dakong kwestyon ‘sab kinsa ang nipatay ug nagpapatay ni John F. Kennedy ug sa iyang igsuon nga si Senador Robert F. Kennedy? Bisan sa kaabtik sa kapulisan ug military sa Amerika, dakong pangutana nga wa’ pa matubag ang kamatayon sa duha ka personalidad sa politika. Nadugang pa sa talaan ang kamatayon ni Marilyn Monroe ang sikat nga actress sa Holywood nga giingong namatay tungod sa drug overdose. Apan dakong kwestyon nganong gikawat ang iyang internal organs ug unsay iyang koneksyon sa magsuong Kennedy nga gipatay ‘sab. Nahimo ‘sab nga sentro sa diskusyon ang Bermuda triangle nga hangtud karon, wa’ pay tataw nga tubag ang pagkawagtang sa mga eroplano, barko ug mga tawo nga sakay sa ilang pag-agi sa maong dapit sa kadagatan sa Florida ug Puerto Rico.
Ang nahitabo karon sa Malaysian Airline mahimo ra untang kalimtan ug ilubong sa limot. Apan di’ madawat sa bag-ong henerasyon nga likod sa kahimanan nga atong gihuptan, wa’y tataw nga tubag sa daghang mga pangutana. Normal lang sa mga tawo ang magduda ug motuo sa unsay wa’y kasigurohan labi pa kung kini na lang ang mas tataw nga tubag sa daghang mga pangutana nga di’ matubag sa siyensya ug sa mga eksperto.
- Latest
