Luna nga gipuy-an gipanag-iya sa gobiyerno

Dear Atty. Divine;

Duna ko’y pangutana may labot sa akong gipuy-an sa Mandaue City. Nakapalit ko og balay apan ang yuta gipanag-iya sa gobiyerno sa national government, gusto unta nako nga hingpit nang maangkon ang yuta nga akong gipuy-an, unsa may angayan nako nga buhaton aron akong mapanag-iya ang yuta nga iya sa gobiyerno? Asa man ako mo-apply niini? Palihug tambagi ako kun unsay angayan nako nga buhaton. Daghang Salamat. — Mr. Romulo A.

Dear Mr. Romulo;

Sa dili pa ikaw mohimo og lakang alang sa pagpanag-iya sa maong yuta mas maayo nga imo unang susihon sa Assessor’s Office sa Mandaue City kun unsay background sa yuta nga imong gipuy-an ug kun tinuod ba nga gipanag-iya kini sa gobiyerno. Makadaghan na man gud na mahitabo nga ang mga ukopante nagtuo nga iya sa gobiyerno ang ilang gipuy-an apan aduna diay pribadong tawo nga nanag-iya niini hinungdan nga moresulta kini sa demolition ilabi na kun gamiton na sa tag-iya ang maong luna. Kun imong makompirmar nga gipanag-iya kini sa gobiyerno unya daghan mo nga nagpuyo sa maong lugar mas maayo nga maghugpong mo pinaagi sa paghimo og association sa mga homeowners aron maghiusa mo sa inyong tinguha alang sa pagpanag-iya sa maong yuta. Mas maayo sab nga moduol mo og opisyal sa Mandaue City aron magpatabang mo kun unsaon ninyo pag-angkon ang inyong luna nga gipuy-an. Duna nay daghang yuta nga gipanag-iya sa National Government nga gitugyan na sa mga nagpuyo niini

pinaagi sa pagbaligya ngadto sa mga ukopante, ang National Housing Authority kon NHA ang mi-process niini. Busa ang imong tinguha nga pag-angkon sa yuta dili imposible basta ang maong yuta gipanag-iya lang sa gobiyerno og na classify kini nga residential area ug importante nga maghiusa mong mga nagpuyo niini alang sa maong tinguha. Hinaut nga akong natubag ang imong pangutana.Daghang Salamat ug God Bless!— Atty. Divine

Kun ikaw adunay pangutana may kalabutan sa problemang legal, ipadala lang sa Legal Corner sa Banat News sa V. Gullas Street, Cebu City or email sa [email protected] ug akong tubagon ang inyong pangutana pinaagi sa akong column matag adlaw’ng Miyerkules ug Domingo.