Ang China naghinayhinay na gyud og kamang paingon sa atong teritoryo.
Karong bag-o, adunay barko nga nagpakayab og bandira sa Pilipinas nga nagkarga og resupply nga mga construction materials gi-alihan sa Chinese Coast Guard sa Ayungin shoal ug gipabalik sa agi pauli sa gigikanan nga lugar.
Ang Ayungin shoal hilabihan na nga kaduol sa kinadaplinan nga dapit sa Palawan ug nasulod sa atong exclusive economic zone, apan adunay mga Chinese Coast Guard nga nanghawod.
Apan ang Pilipinas igo ra gyud sa pagsang-at og diplomatic protest. Basin mangutana mo nako unsay akong gusto mahitabo. Apan tubagon ko kini og laing pangutana: “hain man diay atong mga sakop sa Philippine Coast Guard nga wala may naka-secure sa mga barko sa Pilipinas diha sa atong teritoryo?
Hangtod karon, walay preparasyon nga gihimo ang kagamhanan sa Pilipinas gawas sa pagpamalit sa mga surplus mga barko, fighter jets ug helicopter gikan sa mga nasud sa gawas. Surplus? Dili pa ba gyud kita maka-afford og brand new?
Dili ko ganahan mamasangil, apan makaduda kaayo kining pagpamalit sa Armed Forces of the Philippines og mga kagamitan sa panggubat gitabonan gihapon sa korupsiyon.
Usa pa gyud, ang atong mga estudyante sa kolehiyo, ilabi na ang mga lalaki, wala gihapon nato pugsa og pakuha og Reserve Officer Training Corps (ROTC) isip pangandam engkaso og tinud-on ta og labtik sa China, duna tay andam nga mga tropa.
Pero mao gihapon, atong mga estudyante sa kolehiyo palimpyohon ra gihapon og kanal ug estero, pasilhigon sa karsada ug papuniton og sagbot sa kataw-anan nga National Service Training Program (NSTP).
* * *
Nahilom na man ang isyu kalabot sa binanggaay sa barkong de pasaheroan sa 2GO ug sa de karga nga barko sa Sulpicio.
Samtang nagpaabot ang publiko unsay resulta sa Special Board of Marine Inquiry, nagpaabot usab kita kun andam ba ang 2GO ug Sulpicio pagpanubag sa kadaot nga ilang nahimo sa lungsod sa Cordova. Si Mayor Adelino Sitoy sa Cordova misulat sa 2GO sa pagbayad sa lungsod og P126.855 milyones isip danyos.
Apan dali kaayong nakatudlo ang 2GO sa Sulpicio kay dili kuno sila ang hinungdan sa oil spill nga nakadaot sa kadagatan sa Cordova ug nakadaot sa panginabuhian sa mga mananagat sa lungsod.
Taym pa ra gud, giunsa pagseguro nga ang Sulpicio ang hinungdan nga wala man gani kini malunod? Diin man gikan ang mga oil nga mitabon sa kadagatan human sa binanggaay sa Lawis ledge?
Mas maayo bayaran na lang sa 2GO ang Cordova ubos sa ilang Corporate Social Responsibility. Kay ang nadaot sa oil spill human malunod ang barko sa 2GO dili lang ang ekolohiya sa kasilinganan kun dili hasta ang panginabuhian sa lungsod nga gitawag og “bakasi capital†sa Sugbo.