Diskriminasyon

Gipaabot nga daghan na usab ang dili makatrabaho sa mga mogradwar sa kolehiyo ug high school niining tuiga tungod sa kakuwang sa trabaho.

Sa pagka karon adunay 12.1 milyones ka Pinoy ang walay mga trabaho kini sigun sa pinakauwahing resulta sa survey nga gihimo sa Social Weather Station (SWS). Sa 12.1 milyones ka mga walay trabaho, 2.5 milyones niini ang nawagtangan og trabaho niadtong bulan sa Septyembre hangtod sa Disyembre sa miaging tuig.

Niining bulan sa Marso madugangan na usab ang maong gidaghanon tungod sa mga mogradwar sa kolehiyo ug high school.

Tungod sa kakuwang sa trabaho daghang mga haniti ang mihatag sa ilang pagtoo sa hinungdan sa nahisgotang suliran.

Si Akbayan kongresman Walden Bello mitumbok sa kontraktwalisasyon nga maoy hinungdan sa pagsulbong sa gidaghanon sa mga walay trabaho. Samtang ang Chairman sa Partido ng Manggagawa nga si Renato Magtubo mitumbok sa liberalisasyon sa pamuo nga maoy hinungdan sa suliran sa kakulang sa trabaho.

Ang Asian Development Bank mipasangil usab sa kapakyas sa nasud sa pagpakusog sa sektor sa industriya nga maoy hinungdan sa kakulang sa trabaho. Sa iyang bahin, ang ekonomistang si Benjamin Diokno miingon nga ang Pilipinas gikinahanglang mobubo og dugang puhonan sa mga labor intensive ug labor generating nga negosyo.

Apan aduna ako’y idugang niining maong mga pangagpas nga sa akong tan-aw pangagpas nga dinato kay ang mga mihatag niini pulos man mga dato.

Kining akong ipuno pangagpas nga pinobre. Kining akong ipuno dili upod kini pangagpas sa usa ka haniti kay dili man ako haniti apan, kanunay, hinuon ako nga nagtan-aw sa suliran sa kakuwang sa trabaho ug sigun sa akong nakita ang usa sa mga nakaingon kun nganong daghan ang walay mga trabahor mao ang kwalipikasyon nga experience nga maoy gipangita sa mga kompanya nga nangita og trabahante.

Sigun sa akong nakita, ang experience nga kwalipikasyon ang usa sa mga nakatampo kun nganong daghan gihapon ang walay mga trabaho dinhi sa nasud gawas nga makonsiderar nato kining diskriminasyon sa mga nangita og trabaho.

Tungod sa experience nga kwalipikasyon daghang mga bag-ong gradwar sa kolehiyo ug high school ang dili gayod makatrabaho tungod kay wala pa man silay experience kay lagi mao pa man ang ilang paggradwar.

Tungod sa nahisgutang kwalipikasyon ang mga negosyante wala makatabang sa gobyerno sa pagpaminus sa gidaghanon sa mga walay trabaho, hinuon sila pa ang nagpalapad sa gidaghanon sa nahisgotang suliran. Busa sugyot nako ngadto sa gobyerno ug mga magbabalaud, wagtangon ang experience nga kwalipikasyon kun gusto man niining maminusan ang gidaghanon sa mga walay trabaho dinhi sa nasud.