Niining kasaulogan sa International Women’s Month usa sa mga dalaygong babaye diin nahapokus ang atensyon sa kadaghanan mao si Jessica Cox.
* * *
Si Jessica natawo didto sa Amerika nga wala ang duha ka bukton apan makapalupad og ayroplano. Gani, siya ang bugtong piloto sa tibuok kalibutan nga wala’y bukton ug mga kamot.
* * *
Apan dili kay kana lang abilidad nga naangkon ni Jessica. Tungod sa iyang kaisog ug tinguha nga dili igsapayan ang iyang physical handicap, nakat-unan sab niya ang ubang abilidad nga wala sa ubang kababayen-an.
* * *
Dili kay ayroplano lang ang manihuon ni Jessica diin siya lisensyado nga piloto, modrayeb sad siya og awto gamit lang ang duha niya ka tiil, sama sad sa iyang pagpalupad og ayroplano.
* * *
Eksperto sab siya mogamit og computer, ginamit gihapon ang mga tiil. Ug suma sa balita nakaangkon si Jessica og duha ka Taekwondo black belts. Tungod niining kabatid ug kahanas ni Jessica sa paghimo sa mga butang susama ra sa normal nga tawo nahatagan siya og rekognisyon sa Guinness Book of World Records.
* * *
Si Jessica dunay college degree gikan sa University of Arizona ug usa siya ka internationally recognized nga keynote speaker.