Estrikto, apan estupidong bag-ong balaod sa armas

Nagsugod na sa pagsabasaba ang mga responsable nga mga nanag-iya og armas sugod niadtong nakalabay’ng duha ka semana batok sa bag-ong balaod sa paghupot og armas nga gisugdan na og patuman sa Philippine National Police (PNP).

Sa bag-o pang gipirmahan ni Presidente Noynoy Aquino ang Akta Republika 10591 kon Comprehensive Law on Firearms and Ammunitions, kadaghanan sa mga Pilipino nakakita niini   nga usa ka importanteng reporma sa balaod sa armas aron paggukod sa mga loose firearms kon mga armas nga wala’y lisensiya.

Apan sa dihang gisugdan na og patuman sa PNP ang balaod pinaagi sa Implementing Rules and Regulations (IRR) nga gipirmahan ni PNP chief Alan Purisima, daghan ang mitiyabaw tungod sa kabalikwaot sa proseso pagkuha og lisensiya sa tawo nga mohupot og armas, sa rehistro sa armas ug permiso pagdala niini gawas sa panimalay.

Alang niadtong wala pa masayod, sa bag-ong balaod, dili na ang armas maoy lisensiyahan nga maoy proseso sa karaang balaod. Ubos sa R.A. 10591, ang tawo nga gustong manag-iya og armas maoy molukat og lisensiya (sama sa paglukat og lisensiya sa pagmaneho og sakyanan – ang tawo lisensiya ug ang sakyanan rehistro).

Sa ato pa, daghan na ang gastohan sa Pilipino nga buot mohupot og armas kay gawas kaniya nga mobayad pa-lisensiya sa armas, mobayad usab siya pagparehistro sa armas. Ug kun gusto niya kining dad-on sa gawas sa panimalay kay adunay hulga sa kaugalingon, mobayad na usab siya alang sa Permit to Carry Firearms Outside Residence (PTCFOR), apan kinahanglan mobayad og “threat assessment certificate” gikan sa PNP isip rekisito niini, gawas sa mga sakop sa media, abogado, pari, negosyante, ug uban pa.

Alang sa mga dili hilig og armas, makaayo kining bag-ong sistema sa PNP. Nakita nila kining maong bag-ong balaod nga mo-promote sa “gunless society” nga maoy giduso sa mga mahigugmaon sa kalinaw.

Apan alang sa mga mahiligon sa armas, ilabi na kadtong naghupot niini isip depensa tungod sa mga hulga diha sa ilang propesyon, negosyo o trabaho, atras kaayo ang bag-ong balaod.

Nakita sa mga responsible gun owners ang proseso nga usa ka tinguha sa gobyerno aron maminusan ang gidaghanon sa mga Pilipino nga manag-iya og armas.

Kay tan-awa ninyo ang magasto sa gustong mokuha og armas ug sa mopa-renew sa daan nilang mga armas:

1. Bayad para sa lisensiya;

2. Bayad para sa rehistro sa armas;

3. Kun gustong dad-on gawas sa balay, bayad para sa PTCFOR;

4. Kun dili exempted, bayad para sa threat assessment certificate;

5. Tiket sa eroplano paingon ug gikan sa Manila kay kinahanglan man ang personal appearance sa dili pa ma-isyuhan ang mga dokumento;

6. Extra nga kuwarta para sa puy-anan ug pagkaon samtang naa pa sa Manila.

7. Aduna pa gyu’y bayran nga P190 para sa courier nga gamiton pagpadala sa mga plastic ID sa lisensiya ug rehistro sa armas.

Ang mga yanong pordoy nga gustong mohupot og armas kay gikinahanglan sa propesyon, mopiyong na lang ug kalimtan ang pag-angkon niini nga pribilehiyo. Pananglit kanamong mga sakop sa media, unsaon man namo sa pagka-afford niini nga proseso?

Ang atong PNP wala magtan-aw sa dangatan sa komunidad sa mga Pilipino niining estupido nila nga balaod nga gisulong ni Noynoy.

Mas modaghan ang dili lisensiyadong armas niining prosesoha kay gawas nga kuti, mahal na kaayo ang paghupot niini.

Ang mga kawatan, tulisan, kidnapper, ug uban pang mga kriminal wala maghunahuna og palisensiya sa ilang armas ug kun gamiton nila kini, makapaabot ang PNP nga wala nay ikasukol kadtong mga tawong gusto motuman sa balaod ug moundang og hupot og armas.

Makapaduda kaayo nga gituyo sa PNP kining lisod ug mahalon nga proseso sa mga dokumento para sa armas, kay niini, ang publiko wala nay ikasukol ngadto sa ilang mga binuhi nga mga kriminal nga yano kaayong mamiktima sa mga eskina.

Sumala bitaw, daghang mga criminal gang nga mangadakpan nga tag-as kaayo og kalibre sa armas. Madakpan man tuod, apan aduna na sila’y gipamatay ug gipamiktima gamit ang ilang armas nga walay lisensiya.

Unsa kahay naa sa utok ni Noynoy nganong ingon niini ang gusto niyang proseso sa paghupot og armas dinhi sa Pilipinas?

Ang mga magbabalaod nga sunodsunod lamang usab sa gusto ni Noynoy, nagtuon ba kaha sa statistics sa kriminalidad sa nasud. Aduna bay mga kaso nga naglambigit og lisensiyadong armas nga gigamit sa kriminalidad nga angay basehan pag-estrikto sa regulasyon sa licensed firearms?

Parehas kita, wala makasabot sa wisdom sa R.A. 10591, ug labaw nang wala makasabot sa wisdom sa PNP nganong ilang gipangtak-opan ang mga regional firearms and security office kay personal appearance gyud ang ilang gusto.

Kaniadto nga P90 ra ang courier fee, nganong P190 naman karon?  Nakatimaho ko og fund-raising scheme sa PNP niining pagpatuman sa bag-ong balaod sa armas.

Maayo lang unta og sa unahan, maikog ra si Purisima sa mga responsableng gun owners.