Ang pagpahigayon og checkpoint sa kapolisan usa sa mga paagi nga makasanta, ug kun dili man g’yud kapugngan, makapasulbad sa lainlaing krimen kay posible man nga madakpan dayon ang mga kriminal.
Daghang checkpoint sa kapolisan nga ipahigayon nila sa lainlaing dapit sa dakbayan, ilabi na panahon sa gabii, apan sagad sa ilang pahunongon kadto ra man nga nagsakay og motorsiklo.
Kun duna may passenger jeepney nga parahon sa mga polis, ang mga lalaki ra usab maoy ilang rekisahon ug hilngon ang mga dala nga bag ug wala’y labot ang mga babaye.
Nakalimot na tingali ang mga polis nga adunay mga tulisan nga may mga kaubang babaye. Kun ang babaye maoy padad-on sa tulisan sa ilang armas sa dili pa sila manulis, dili masakpan nga nagdala sila’g armas?
Ang checkpoint sa kapolisan wala lang kini gitumong alang sa mga tulisan kun dili apil sa mga tawo nga magdala-dala og armas nga wala’y pagtugot.
Kining kahaguka sa pagpahigayon og checkpoint sa kapolisan dugay na kini kaayo ug hangtod karon wala pa g’yud nila usba nga ang mga babaye’ng pasahero dili nila apilon pagrekisa.
Ang ubang polis nga mag-checkpoint dili lang gani pakanaugon ang mga babaye sa PUJ nga ilang sakyan.
Aron epektibo ang kampanya batok sa mga tulisan ug sa mga tawo nga magdala-dala’g armas nga wala’y pagtugot, angay’ng hugtan g’yud ang paagi sa pagpahigayon og checkpoint.
Ang Espada
Ang sipyat ni Cunanan
Ni q Ni Wen Celen
Misaka kuno ang kaso sa abortion tungod kay wa aprobahi ang RH Bill, matud pa sa Dept. of Health (DOH).
Kay kun gibalaod pa kuno ang maong balaudnon hayan may proteksyon na ang kababayen-an nga di gustong manganak.
Kini tungod kay kun mabalaod unta ang RH Bill ariyahan man sa gobiyerno og libreng mga gadgets batok panganak ang mga barangay health center nga sayon ra kaayong makuha sa mga babaye ug lalaki nga gustong di modaghan ang anak.
Gipasalig sa gobiyerno nga ilibre niini ang mga pills, condom, vasectomy ug uban pang kahimanan alang sa pagsanta sa pagpadaghan sa anak.
Pero unsaon man nga daghan mang way gusto sa RH Law kay mas gusto sila nga mosanay ang kabataan sa nasud, nga mga anak sa kinasal ug di kinasal ug tan-awa ninyo kinsay numero unong supak sa RH Law.
* * *
Topnotcher diay ang mga LGU sa pangurakot, gisundan sa kapolisan, ug ikatulo ang mga sundawo.
Wa na kahisguti dinhi ang Bureau of Customs, BIR, ug uban pang ahensya sa gobiyerno nga giyak-an sa mga kurakot nga opisyal.
Kini maoy nakapaut-ot sa ekonomiya sa Pilipinas, nga sa kadaghan sa buhis nga mahipos unta sa kagamhanan matag tuig, tua ra sa bulsa sa mga tulisang opisyal sa kagamhanan mahipunta.
Hinuon gitun-an man usab kini nila, ug sa ilang kahakug bahala na kun magtinga sa kagutom ang kadaghanan basta sila nga mga opisyal, lakip ang ilang pamilya, ug mga anak ug apo, haruhay ugma damlag kun sila mamatay na.
* * *
Misipyat si Dennis Cunanan kay wa siya muangkon nga nakadawat siya’g suborno nga P960,000 kun himabaw sa usa ka milyon ka pesos gikan kang Napoles, ang utok sa P10 bilyones nga pork barrel fund scam.
Dinhi naguba ang iyang kredibilidad. Tingale nabalaka siya nga kun iyang angkonon, pabayron siya sa gobiyerno, ug gikinahanglan gayud nga iya kining bayran kay buhis kini sa katawhan alang sa atong nasud.
Apan ang wala niya pag-angkon nga nakatampo siya sa pangiriw, wa magpasabot nga way kamatuoran ang iyang gipanulti batok sa mga senador nga nakabulsa og minilyon ka pesos gikan sa ilang PDAF.
Busa angay siyang ipapriso kun di makabayad sa nabulsa niyang buhis, apan mas gaan-gaan siya og silot tungod sa dugang niyang pagsaksi batok sa mga magbabalaod nga dagko og nabulsa nga kantidad sa ilang PDAF.