EDITORYAL - Walay respeto sa nasud

Ang bandera maoy simbolo sa atong nasud mao nga angay kining yukboan sa katawhan, ilabi na niadtong mga nagtrabaho sa kagamhanan. Kun dili kamo morespetar sa bandera, tabla ra nga wala usab kamo morespitar sa nasud.

Naandan na nga mata’g unang adlaw sa trabaho sa semana ipahigayon gayud ang flag-raising ceremony diha sa mga opisina sa kagamhanan ug giawhag ang mga kawani sa pagtambong.

Kabahin kini sa ilang katungdanan kay ang pag-isa sa bandera aron ipakayab kini sa tumang kamapagarbohon sa iyang flag pole, himuon man alas utso sa buntag. Magsilbi usab kini nga pagsukod sa batasan sa usa ka kawani.

Taud-taud na nga nakabantay si Mayor Michael Rama nga mata’g flag-raising ceremony sa City Hall kada Lunes sa buntag, daghang mga kawani ang dili motambong. Ang uban moderitso lang sa opisina ug dili na mobalik.

Nakabantay usab ang mayor nga ang ubang kawani anaa man tuod miapil sa flag-raising ceremony apan nagsige og text gamit ang ilang cellphones. Mibahad ang mayor nga taktakon sa trabaho kadtong dili motambong sa flag-raising ceremony.

Kay wala may pagtahod ang mao nga mga kawani sa simbolo sa atong nasud nga mao ang bandera, angay tingali nga dili sila motrabaho sa kagamhanan kay naandan man g’yud sa mga opisina sa gobiyerno nga dunay flag-raising kada Lunes. Kun dili mag-inistrikto ang mayor, mahimong manakud ang gihimo niining mao nga mga kawani ug moabot ang panahon nga maihap na lang unya sa mga tudlo ang motambong sa flag-raising.