Kun kamo adunay yuta nga wa ninyo puy-i, mas maayo nga inyo gyud kining kuralon aron way mga tawo nga mosuway sa pagpahimus niini pinaagi sa pagtukod og bisan unsang struktura sa imong property nga diin kamo na unya hinuon ang magkaproblema ilabi na kun di na kini gustong mopahawa. Apan unsa bay imong buhaton kun adunay tawo nga mipahimus sa yuta nga wa mananghid kanimo? Kana nga pangutana ang atong tuki-on karon dinhi ning atong column.
Dear Atty. Divine,
Aduna ko’y iyaan nga naminyo og langyaw ug tua na magpuyo sa gawas sa nasud. Nakapalit siya og dakong yuta diri sa Lilo-an ug iya ning gipabantayan aron dili puy-an og squatters. Usa ko sa gipabantay sa akong iyaan sa maong yuta. Apan adunay akong amigo nga akong gitugutan nga makapananum sa yuta sa akong iyaan ug ang among sabot nga kun gamiton na ang yuta mopahawa siya dayon. Sa dihang miuli ko sa among probinsya ug mipuyo ko ngadto sud sa pipila ka buwan, pagbalik nako sa Lilo-an aduna na may tulo ka tindahan nga gitukod sa yuta sa akong iyaan. Sa dihang ako silang gisita, ang ilang gisulti nga nananghid kono sila sa akong amigo nga maoy nagpaila kanila nga caretaker sa maong yuta. Ako silang gipapahawa lakip na ang akong amigo ako nang gipahunong sa pagtanum. Apan ang akong amigo di na man mopatuo ug di na man mopahawa lakip na kadtong tulo ka tindahan nga iyang gipatukod. Matud pa sa akong amigo nga dili sila mopahawa hangtud nga dili mabaligya o makoral ang maong yuta.Naproblema na hinuon ko niini attorney hinungdan nga midangop ko kanimo aron sa pagpangayo og giya kun unsa may maayo nakong buhaton? Gusto unta nako nga mapapahawa na sila kay mouli na sa sunod buwan ang akong iyaan. Hinaut nga imo kong matabangan sa akong problema. — Roland
Dear Roland,
Kay ikaw man gyud ang matuod nga caretaker sa yuta sa imong iyaan mamahimo nimo silang isumbong sa barangay diin mahimutang kanang yuta sa imong iyaan aron kamo magka-atubang. Imo silang sulti-an nga mouli na ang imong iyaan ug gamiton na ang maong yuta busa kinahanglan na silang mopahawa. Imo sab sultian ang barangay nga way pagtugot gikan kanimo ug sa tag-iya ang ilang gihimong pagtukod og tindahan sa yuta sa imong iyaan. Way katungod ang imong amigo ug ang tag-iya sa tulo ka tindahan nga mo-insister nga magpabilin sa maong luna kay dili man sila ang tag-iya niini ug wa say pagtugot gikan sa tag-iya ang ilang paggamit sa maong property. Kun pananglitan atul sa inyong pag-atubang sa barangay dili gyud mo magka-areglo kay dili gyud sila mopahawa, lain nimong buhaton mao ang pagdangop og abogado aron ang lawyer na ang mopadala kanila og demand letter. Mas maayo sab nga imong sultian ang imong iyaan sa nahitabo sa iyang yuta ug imo siyang kombinsihon nga kuralon na ang iyang yuta aron wa nay tawo nga mogamit niini nga way pagtugot gikan kaniya. Hinaut nga pinaagi niining akong tambag masulbad ang imong problema. Daghang Salamat ug God Bless. — Atty. Divine
* * *
Kun ikaw adunay pangutana may kalabutan sa problemang legal ipadala lang sa Legal Corner sa Banat News or email sa flores_divina@yahoo.com ug akong tubagon ang inyong pangutana pinaagi sa akong column matag adlaw’ng Miyerkules ug Domingo.