Nakapunto ang Sugbo

Miani og mga pagsaway ang pagselebrar ni Presidente Benigno Aquino III sa Edsa Revolution dinhi sa Sugbo. Matud pa sa iyang mga kritiko nga mas gipili hinuon ni Aquino ang pag-anhi sa Cebu atol sa maong selebrasyon kay sa didto sa kaulohan nga maoy sentro sa rebolusyon kaniadtong 1986.

Midalikyat si Aquino dinhi sa Sugbo kaniadtong Martes aron pagsaulog sa ika-28 nga anibersaryo sa Edsa Revolution. Siguro iyang gituyo ang pagselebrar dinhi tungod kay gikan man siya mibisita sa mga lugar nga naigo sa niaging mga kalamidad.

Apan daghan ang miangal ngano nga dinhi pa sa Sugbo gipahigayon ang dakong selebrasyon. Didto man kuno sa kaulohan ang dakong aksiyon niadtong pag-alsa sa katawhan batok diktadoryang rehimen ni Ferdinand Marcos.

Didto usab sa Manila, nagkadaiyang reaksiyon ang naani sa absent nga presidente atol sa maong kalihokan. Daghan ang natingala gumikan kay mao pa kadto sukad nga ang labing gamhanang tawo sa nasud wala sa maong espesyal nga selebrasyon.

Ug dinhi sa Sugbo, bagulbol didto, yawyaw dinhi tungod lagi sa grabeng trapik nga dala sa maong selebrasyon nga didto gipahigayon sa may Capitol grounds. Maayo na lamang nga walay klase niadtong tungora.

Apan sa laing bahin, nakapunto ang Sugbo pag-host niini sa presidente alang sa maong kasaulogan. Angay usab natong isipon nga dako kadto nga garbo nga mismo ang Sugbo, tungod sa pagdumala sa presidente sa maong kasaulogan, maoy sentro sa selebrasyon sa malinawong rebolusyon nga nahimo nang sumbanan sa tibuok kalibotan.

Tungod lagi kay presidente, katungod ni Aquino asang suok ning nasud mosaulog sa selebrasyon paghibalik sa demokrasya sa nasud. Siguro gituyo niya nga anhi sa Sugbo mosaulog tungod sa rason nga adunay dakong papel ang mga Sugboanon sa kampanya pagpalagpot sa diktador.

Ang Sugbo maoy isog nga miparang sa diktadorya kaniadto. Gani ang mga Sugboanon maoy mipandong kang Cory Aquino sa iyang pagbiya sa kaulohan aron pag-ukay sa nagbukal nga kampanya pag-boycott sa resulta sa snap eleksiyon.

Tungod niini, angay lamang nga mabutang ang Sugbo sa insaktong puwesto niini sa kasaysayan.