Naghitak ang kadautan sa kalibutan labina ang pagtaas sa kriminalidad. Gumikan sa kalangay sa hustisya daghan ang nihukom nga mas maayo pang pangunayan ang pagpahamtang sa hustisya diha sa paagi nga mapintason.
Apan ang nakadaut kay mas doble pa man hinuon ang gipahamtang silot kaysa mga salaod nga nahimo apil na niini ang paghunos sa kinabuhi niadtong mga masalaypon. Ang atong ebanghelyo karong Domingoha nga ang atong Ginoo sa tinuod nagtudlo sa kamahinungdanon sa pagpahamtang og hustisya ingon man ang paghunong sa dili makiangayong sistema. Pananglit kun paninglan ka sa imong kamisin agi’g bayad sa imong utang, imong ihatag ang imong kamisadentro usab. Ang kamisin panalipod sa imong kahubo ug kun ihatag pa gyud nimo ang imong kamisadentro sa ato pa, hubo ka na gyud.
Paagi kini aron ang hingtungdan makaamgo nga usa ka dili makiangayon nga buhat ang iyang gihimo diha sa malupigong pagpaningil. Ang paghimo og maayo paagi aron mas mapadayag ang kadautan sa uban. Kay ang paghambin og panimalos mao ang paghalad sa kaugalingon ngadto sa gahum sa imong kaaway. Kini tungod kay ang imong kasuko ngadto kaniya ang niulipon man kanimo. Lisud man tuod ang pagpasaylo apan dili kini imposible nga mahitabo.