Si Archival sa Kapitolyo

Bisan nibiya na si kanhi gobernador Gwen Garcia human sa pila ka semana nga pagbarikada sa iyang buhatan sa niaging tuig, ang iyang mga dumadapig nagdumili pagkanaog sa Kapitolyo. Usa sa nitanyag og tabang ni kanhi acting governor Agnes Magpale atubangan sa dakong hulga sa kaguliyang mao si kanhi kongresista Tommy Osmeña. Kinsa nipasalig nga, “I will send you a very good criminal lawyer.”

Nibutho sa buhatan ni Magpale sa Legislative Building human lang sa pila ka gutlo si Atty. Noel Archival. Inay mopaila ug molamano ni Magpale, gihulbot ang iyang cellphone, may numero nga gitawgan ug sa tingog nga nakapahugyaw sa daghan uyamot nga mga hukmanan nideklarar, “I am now in the Acting Governor’s office.”

* * *

Giputlan na sa tubig ug kuryente ang mga buhatan nga nahimutangan sa mga dumadapig ni Garcia. Apan niinsistir gihapon sila nga magpabilin. Gipasaligan ni Archival si Magpale nga siya ang bahala. Wa siya’y pupanagana nga nisungasong sa bahin sa Kapitolyo nga giokupahan sa mga Garcia.

Gihangop ni Archival ang tanang abogado nga iyang naabtan didto. Bisan unsay pundok nga ilang girepresentahan. Masaligon kaayong mahusay niya ang krisis. Kay may alas diay’ng nahunahunaan: Dihang nitikyop nang kangitngit nagkasabot silang mga abogado ni Magpale nga ablihan ang tanang bintana. Dihang nakasud nang daghang lamok, way dumadapig ni Garcia nga nagpatugatuga og pabilin.

* * *

Nagka-engkuwentro ming Archival dihang siya ang nibarug nga abogado sa dakong opisyal sa kapolisan nga gikasinumbagay sa kanhi kauban nakong kawani. Gitawgan ko ni Archival ug gihagit sa pagkumbinser sa among kompaniya sa pagpatigbabaw sa kamatuoran ug sa di pagdupa sa among kawani.

Dihang gitaktak sa kompaniya ang kawani, human napamatud-an sa makuti nga pakisusi nga wa mosulti sa tinuod nga mga panghitabo sa iyang taho ug sa iyang pag-atubang sa kadagkoan sa kompaniya, gitawgan na sab kong Archival ug isog nga gisukmatan, “Paita, gitinuod man sab ninyo, Bay. Nganong gitaktak man gyod ninyo? Suspenso lang unta to.”

* * *

Naluoy kaayo mi ug ang among mga tigpaminaw sa gidangatan sa among kaubang kawani. Apan way kapilian ang kompaniya kay ubos sa among code of ethics pagkatangtang man gyod sa trabaho ang labing gamay nga silot sa dishonesty. Sunod sa kompaniya ug sa among mga tigpaminaw ang labing dako og tabang nga nahatag ngadto sa among kanhi kauban mao si Archival.

Takos si Archival nga motabang ug mopakatawa bisan sa mga kaatbang niya sa kaso. Wa ko mahibung nga human sa pila ka semana managhigala na ang among kanhi kauban ug ang iyang gikaaway nga dakong opisyal sa kapolisan. Way makakuwestiyon sa kamaayo ni Archival nga mohusay sa seryuso nga mga panagsungi. Kun gihatagan pa lang unta siya og higayon sa mga nipili pagkumkom sa balaod…

leo_lastimosa@abs-cbn.com