Yuta nga ibaligya, nawala ang titulo

Kun ikaw mopalit og yuta nga titulado kinahanglan seguruon gyud nimo sa pagkuha ang kopya sa original title niini gikan sa tag-iya kun imo nang bayran ang maong property.Kini aron dili ka maproblema sa pagpa-transfer sa maong property ngadto sa imong pangan. Apan kun nawala ang titulo sa property nga gitanyag kanimo, angayan ba kini nimong paliton? Kana nga pangutana ang atong tubagon karon dinhi ning atong column.

Dear Atty. Divine;

Adunay baligyang yuta nga gitanyag kanako. Ang mga heirs kon sumusunod na ang gustong mobaligya niini. Ang problema lang kay wa sila’y kopya sa titulo sa yuta kay matud pa ang ilang inahan ang nagkupot sa titulo ug sa dihang namatay ang ilang inahan wa sila masayud kun asa niini gibutang ang maong titulo. Sa dihang nangayo ko og certified true copy sa Register of Deeds sa maong titulo wa man ko’y nakita nga annotation niini. Apan ang akong pangutana kun angayan bang paliton nako ang maong yuta bisan kun nawala ang original title niini? Unsaon man nako pagkuha pag-usab og original nga titulo sa maong yuta? Hinaut nga imo kong magiyahan kun unsay angayan nakong buhaton. Daghang Salamat. —Tecia

Dear Tecia,

Kun tinuod gyud nga nawala ang ilang kopya sa original title sa maong property nga gusto nilang ibaligya, mas maayo nga magpa-issue una sila og bag-ong kopya niini pinaagi sa pagpasaka og Petition ngadto sa korte for the issuance of new owner’s duplicate of title isip hulip sa nawala nga titulo. Kun wa ka magdali sa pagpalit sa maong yuta mas maayo nga imong huwaton nga aduna nay bag-ong kopya sa titulo nga kuptan ang mga heirs. Ang mahitabo man gud kun imong paliton ang yuta pagkakaron bisan kun nawala ang original title niini hayan dili ka maka-process sa pagbalhin sa maong yuta ngadto sa imong pangan. Basi sa Property Registration Decree kon P.D. 1529, kini nagkanayon nga way instrument nga marehistro sa Register of Deeds kun dili mapresentar uban niini ang original nga titulo. Buot ipasabot nga mabalhin lang sa imong pangan ang titulo sa maong yuta kun imong ma-surrender ngadto sa Register of Deeds ang original title uban sa dokumento sa pagbaligya. Kining pagpasaka og Petition sa korte alang sa pagpa issue og bag-ong kopya sa titulo dili man kaayo taas ang proseso niini ug kun dili lang kaayo daghang kaso ang korte nga matungnan sa ilang Petition hayan sud sa usa ka tuig aduna na silay makuhang bag-ong titulo. Mas safe alang kanimo nga mopalit sa maong yuta nga aduna gyuy kopya sa original title. Hinaut nga akong natubag ang imong pangutana. Thanks and God bless. — Atty. Divine

Kun ikaw adunay pangutana may kalabutan sa problemang legal, ipadala lang sa Legal Corner sa Banat News sa V. Gullas Street, Cebu City ug akong tubagon ang imong pangutana pinaagi sa akong column matag adlaw’ng Miyerkules ug Domingo.