12 milyones way trabaho

Taliwala niining giingong kusog nga paglambo sa ekonomiya sa Pilipinas, aniay dili maayong balita. Kini adunay kalabotan sa dakong unemployment rate sa nasud nga hagbay rang problema sa kagamhanan.

Matud pa sa survey sa Social Weather Station nga mokabat kapin sa 12 milyones ka mga Pilipino ang walay trabaho sa niaging tuig. Kini gumikan usab sa kakulangon sa bakante’ng trabaho.

Sukwahi kini sa gipasiatab sa gobiyerno nga daghan na ang nakatrabaho nunot niining pag-asenso sa ekonomiya sa nasud. Gani nalipay kini gumikan kay daghan na kunong investor ang mibubo og puhonan.

Ang maong survey migawas human mipahibalo ang gobiyerno nga mitubo ang ekonomiya sa Pilipinas ngadto sa 7.2 porsiyento, ang labing dako sa Asya sunod lamang sa China.

Panghambog sa mga opisyal sa gobiyerno nga ang Pilipinas maoy usa sa labing kinaham sa mga langyaw'ng magpapatigayon dinhi sa Asya gumikan lagi sa maayong economic environment niini. Kini gumikan usab kay sulod sa pipila ka tuig nang misulbong ang ekonomiya sa nasud gumikan sa reporma nga gipatuman sa kagamhanan. Gani, maayo ang dagan sa panalapi sa nasud hinungdan sa nagkadakong dollar reserves niini. Hasta ang Philippine Stocks Exchange maayo ang pagsaka nga midani pag-ayo sa international business community.

Kay milambo man ang ekonomiya, milambo usab unta ang sektor sa mga mamumuo. Insakto usab unta ang suholan sa mga trabahante. Labaw sa tanan, daghan na usab unta ang nakatrabaho gumikan sa pagdagsa sa mga mamumuhonan.

Apan unsay nahitabo sa mga programa sa kagamhanan nga gitumong paghaw-as sa mga kabus gikan sa kapobrehon? Nganong wala man kini misaler pagtabang sa kinabag-an nga grabeng nagkinahanglan?

Siguro ang problema anaa sa mga programa pagpadagayday sa bunga sa milambo nga ekonomiya ngadto sa katawhan. Bisan pa kun si kinsa ang pangutan-on, wala gyuy motubag nga miasenso sila sa ilang pamuyo gumikan sa pag-uswag sa ekonomiya sa nasud.

Angay nga mohimo og dinaliang aksiyon ang gobiyerno niining maong problema aron dili mausik ang bunga sa ekonomikanhong paglambo sa nasud.