EDITORIAL - Palpak sa mga Polis

Daghang kaso nga gipasaka sa kapolisan batok sa ilang mga dinakpan nga nakahimo og salaod ang gi-dismiss lang sa mga huwes kay wala magkatukma ang pamahayag sa mga arresting officers.

Walay mahimo ang huwes kun dili ang pagbasura sa mga kaso nga gisang-at sa kapolisan kun magkasumpaki ang pamahayag sa mga nagdakop sa suspek kay makapaturok kini og pagduda sa katinuoran sa pangangkon sa mga polis.

Usa ka polis gisukit-sukit sa huwes kun diin siya magpwesto dihang gironda ang balay sa suspek nga matud pa nakuhaan og pinakete nga shabu. Mitubag ang polis nga apil siya sa misiksik sulod sa balay.

Laing polis nga prosecution witness gipaatubang na usab sa huwes ug mitug-an nga kadtong iyang kauban nga unang nangangkon nga apil siya sa searching team, didto ra diay magbantay sa gawas sa balay aron pagsiguro nga dili makaikyas ang ilang gironda.

Sa ato pa wala g’yud siya makakita dihang napalgan ang shabu.

Ang balaud naglatid nga kun adunay bisan gamay na lang nga pagduda sa katinuoran sa pamahayag sa kapolisan ang akusado maoy hatagan og pabor sa disisyon.

Angay unta nga ang kapolisan nga mouban og raids ug ubang pagpanakop, magtinil g’yud og notes nga ilang tipigan ug tamdan kun moabut na ang higayon nga sila paatubangon na sa hukmanan.

Kadtong mga polis nga adunay “court duties” sa buntag kinahanglang dili patrabahoon kun gabii ang ilang duty aron dili sila magduka didto sa hukmanan nga dili na makahinultol sa pagpanubag.