Mr. Barangay

Human migawas sa akong column niadtong miaging semana ang kabahin sa pagpamugos pagpapirma sa mga tawo sa brgy Sillon lungsod sa Bantayan nga sila nakadawat na’g hinabang pero wala pa diay, daghan dayon ang mi-text nako gikan sa Bantayan. Ilang gipahibawo nga gihimo ni nga paagi sa hapit tanang barangay sa Bantayan nga papirmahon sila’g pugos kay naay madawat nga hinabang pero ang nabutang sa papel nadawat na nila kay pagbuot daw ni sa DSWD. Mao ni rason nga akong gisusi sa DSWD 7 kun tinuod ba, apan nakuratan ang tigpamaba sa maong ahensya nga si Aillen Lariba kay wala sila‘y instruction bahin niini gani iya kining gihulagway nga illegal. Ingon usab niini ang pamahayag sa usa ka graft investigator sa Ombudsman Visayas nga usa ka pagpangilad ang gihimo sa opisyal kun papirmahon ang tawo nga nakadawat na sa hinabang bisa’g wala pa. Gani iyang gihagit ang mga tawo nga mopasaka’g reklamo aron ma-imbestigar ang mga kapitan ug ang mayor sa lungsod sa maong paagi nga gihulagway nga deception.

 

Brgy Caliongan, Dalaguete, Cebu

“Sir daghan na kaayo ang namaligya’g shabu diri sa among lugar nga maoy hinungdan nga misiaw na sab ang pagpanglungkab diri, hinaut unta nga mahatagan unta dayun ni og pagtagad.”

 

Brgy Mancilang, Madridejos, Cebu

“Ngano wala man gyod atimana sa mga opisyal sa barangay ug lungsod ang libaong sa among mga karsada sigehan lang og tapak nga miresulta hinuon sa pagbati og maayo sa karsada.”

 

Brgy Pajo, Lapu-Lapu City

“Diri bitaw sa among lugar Sir dunay bahin sa Sangi road nga kun mag-uwan taga tuhod ang tubig wala gyud ni maayo’g atiman ang drainage system ani kay dili man dagko maong daling mobaha.”

 

Brgy Mantuyong, Mandaue City

“Nagkagrabe na man ang problema namo diri sa illegal drugas Sir display na kaayo kay wala may nagpakabana pagdakop nga mga polis, kuyaw kaayo nga maimpluwensyahan ang mga bata diri kun dili ni masumpo.”

 

Brgy Buenavista, Carcar City

“Sir Jun wala man gyud maatiman sa among kapitan karsada namo diri nga labihan nang gubaa kay wala klarong drainage wala man gyod lihoka sa among mga opisyal sa barangay.”

 

Brgy Guiwanon, Bantayan, Cebu

“Amo lang ireklamo Sir kining mga tawo sa Banelco kay dili man motaud sa linya sa kuryente kun dili mi kahatag og pangpatingal luoy kaayo ming wala’y kuwarta kay dili dayon matauran.”

 

Brgy Cantipay, Carmen, Cebu

“Wala gyud masulbad ang problema namo sa tubig pila na ka tuig wala na sudli ang tangke kay ang linya gideretso na man ang mga linya ngadto sa mga dato unya wala gyod miatiman ang kapitan sa among reklamo.”

 

Brgy Lucnay, San Fernando, Cebu

“Tabangi mi diri sa among lugar kay grabe na ang problema sa shabu gani duna anak nga gikulata sa amahan kay gibaligya ang kanding para lang naay ikapalit og shabu.”

 

Brgy Kangkaibe, Bantayan, Cebu

“Sir palihog mi’g pasusi kay naay gipapirmahan namo diri nga nakadawat nami’g hinabang pero hangtod karon wala pa gyod namo madawat ang hinabang.”

Alang sa inyong mga reklamo text lang sa 09071678643