Mugasto og P180 milyones ang kagamhanan sa dakbayan sa Sugbo karong adlawa aron paghatag og ‘tag P3,000 ngadto sa dul-an sa 60,000 ka senior citizens dinhi sa siyudad.
Pagka swerte sa atong katiguwangan nga gipangga sila sa kagamhanan sa dakbayan. Ang kadaghanan hinoon nasayud nga sagol-pamolitika ang paghatag og dagko nga cash assistance sa mga senior.
Mga botante gud ang tanang 60,000 ka senior citizens ug kun putlon ang paghatag kanila’g hinabang, ambot makadaug pa ba kaha ang mga opisyal sa sunod nga eleksyon.
Gisugdan ang paghatag og tabang-salapi sa mga senior citizens sa administrasyon ni kanhi mayor Tomas R. Osmeña ug gipadayon gihapon ni Mayor Michael Rama.
Klaro kaayo nga giabusohan kining paghatag og benepisyo sa mga senior kay bisan kadtong tua na magpuyo sa ubang lugar, dia g’yud magparehestro isip botante sa dakbayan sa Sugbo.
Kamatuoran niini, daghang senior citizens nga tua na nagpuyo sa lagyo nga dapit dili usahay makakobra kun manghatag na sa ilang cash assistance.
Dunay mga senior citizens nga mopauli lang dinhi kun manghatag na ang City Hall sa cash assistance, ang uban mosipyat g’yud. Tukma ang lagda nga kadtong dili makakuha sa ilang cash assistance lapas sa 15 ka adlaw gikan sa pagpanghatag dili na g’yud hatagan pa.
Ang ubang senior citizens bisan og may edad na apan makamao pa gihapon nga manglimbong.