Death Penalty law ipatuman na usab?

Ang usa ka lider dili  tungod  kay lider siya mo-shortcut na  siya  sa balaod. Ang balaod ,balaod gyud  ug  angay  kining  respetohan sa tanang  higayon  gawas  lamang kun  uyonan  sa imong  mga  sakop  nga  usbon  nimo  ang balaod.

Sa Talisay City   nahimong  isyu  ang  paghimo og  lakang  sa mayor  sa maong  dakbayan  nga  wa kauyoni  sa kadaghanan sa iyang  mga  sakop.

Ang    pagmontar  niya  og   bag-ong  opisyal  sa Talisay City College nga modumala  sa tanang  kalihukan  niini  nahimong  talinghaga  sa  mga opisyal  nga  iyang gipangunahan.

Ang  uban  nagtuo nga  nalipat  lang  ang mayor ug  nakalimot  sa  pamaagi o  balaod  nga  una  siya moluwat og  kamandoan  alang  sa  mga dagkong gimbuhaton nga  buot  niyang  himoon ,  kinahanglang  iyang  ikonsulta  sa mga  opisyal  ug iyang ginsakopan.

Apan  ang  pagbutang  niya  og usa  ka opisyal  sa  TCC nga  way  pagtugot  sa iyang  mga  sakop   nakapakurat sa tanan.

Wa  sila  magdahum  nga  sa kahalangdon  sa iyang katungdanan  isip  mayor  makaako  siya  sa  pag-unay pagtukmod   sa iyang  kaugalingon  ngadto  sa bung-aw  aron pagpapha  sa   pagsalig sa iyang  ginsakopan  sa iyang  abilidad  isip  lider  sa Talisay.

* * *

Wa maghingapin  ang  kuwarta  sa nasud  aron  usik-usikan  pinaagi  sa pagpamalit  og mga  butang nga  human  sa usa  ka gamit angayan  na  nga  ibasura  kay  di na  magamit  pa  pag-usab.

Pila  ba  diay  gasto  sa  kagamhanan  sa gipamalit niining  precinct count  optical scan machines (PCOS)  nga  gigamit  sa election  niadtong tuig 2010? Minilyon o  kaha  binilyon ka pesos  ang  gigahin  sa kagamhanan  alang  sa maong  mga ekipo  o kahimanan  nga napamatud-an  sa  mga  opisyal  sa Comelec  nga  di na  angayang  gamiton  sa umaabot  nga  piniliay.

Kini tungod  kay  di  na epektibo  ang mga piyesa niini  ug  sa laktud  naghatag  og  labad  sa ulo  sa  taga  Comelec gumikan  sa  pagpalyar  niini  lapas  sa unang  paggamit   niadtong tuig 2010.

Dinhi sa lalawigan  sa Sugbo  nasinati sa kadaghanan  ang  pagkagar  sa maong  mga makina  sa election  niadtong 2013.

Usa  sa hinungdan niini  mao  nga dugay  nga  wala nagamit  ang maong  kahimanan  mao nga naguba.

Mahimong  nasayran  apan  tungod  tingale  sa  kadako  sa komisyon, gipiyongan  lang , unya  karon  nga  namatud-an  na  palyado  gyud, aw angay  na  usab  nga ilisdan, gastoan  og  laing  binilyon  ka pesos  alang  sa lain  na usab  nga  komisyon?

Unsa  man  diay  ang  kondisyon   sa kagamhanan  sa pagpamalit niini? wa bay  garantiya  gikan  sa kompaniya  nga  nag-supply  niini,    tungod  kay  di kada adlaw  ang  election,  busa  di  usab  kada  adlaw  magamit  ang maong  mga ekipo?

* * *

Mayoridad kuno sa taga Bohol gusto  nga ibalik pagpatuman  ang death  penalty gumikan  sa talagsaong  krimin  sa pagpanglugos  nga  nahitabo didto  sa maong  lalawigan. Kay  unsa  ba  diay  ka gamhanan  ang  taga  Bohol  nga  sayon  ra nilang ipausab  ang  balaod  bahin  sa  silot nga  kamatayon.

`Wa na ba  sila  motahod  sa  mga  pari  nga  maoy  miwaldas  pagsupak  sa death  penalty  busa napugos  ang  mga magbabalaod  sa paggusbat  sa maong  balaod?

Ang nasud  sa pagkakaron  nagpahimus  pa gihapon  sa batasan  sa gitudlo sa mga Katsila   nga ang  mga  lider  sa Katoliko  angay  nga manginlabot sa  mga  balaod  sa nasud. Gani ang balaod  sa  pagbuwag  sa simbahan ug  sa estado di  hingpit  nga napatuman  karon  sa  nasud  tungod kay  ang  mga  lider  relihiyoso manginlabot  pa  sa pag-umol og balaod  sa  kagamhanan.

Unya ang death  penalty ipatuman  na usab,  human  kini  ipabasura tungod kuno  kay way epekto batok  sa tiggama og pintas  nga  krimin?