Alang sa tinuoray’ng kabag-ohan sa Bureau of Customs, kugi karon ang kadagkoan sa maong ahensiya pagsuroy tibuok nasud pagsabwag sa mga impormasyon alang sa dakong reporma nga ipatuman unya.
Nag-una ang Sugbo sa gibisita sa kadagkoan sa BOC alang sa information dissemination sa bag-ong lakang pagpatuman sa mga reporma. Kini gumikan ba kaha tungod kay ilado ang Sugbo nga hatdanan sa mga smuggled goods.
Gani sa iyang pagbisita dinhi, si BOC commissioner John Sevilla mipasidaan sa iyang mga tawo mahitungod sa naghitak nga bribery sulod sa ahensiya. Matud niya nga ang maong illegal nga transaksiyon wala nay lugar sa maong ahensiya.
Isog siyang mipahimangno nga kadtong molapas niini, mag-atubang og dakong silot. Kini gumikan kay adunay zero tolerance batok niadtong mga ilegal nga transaksiyon sulod sa BOC, ang usa sa mga ahensiya sa kagamhanan diin naghitak ang corruption.
Ug usa sa mga reporma mao ang transparency diin open sa publiko ang mga transaksiyon sulod sa maong ahensiya ug ang pagpailalum sa digital nga pag-process sa mga dokumento. Usa kini ka paagi pag-discourage sa ilegal nga transaksiyon.
Hinuon atong tutokan kining maong lakang sa liderato sa BOC. Atong hulaton kun aduna ba kini mayong bunga. Mosaler ba kaha kini batok niadtong mga smuggler kinsa daan nang nakagamot sulod sa maong ahensiya?
Hinuon ambot kun epektibo ba kini. Apan atong hatagan og dakong higayon kining giingong mga reporma. Basin pa diay kun mosaler kini ug maoy mobayaw sa imahe sa maong ahensiya.
Dili ikalimod nga ang bureau usa sa mga notoryos nga ahensiya sa gobiyerno diin naghitak ang corruption. Pipila na ka liderato ang misulay paglimpiyo niini, apan puro sila pakyas.
Padayon gihapon ang smuggling sa bugas ug uban pa. Daghan ang miingon nga dili na kini malimpiyo pa, bisan kun si kinsa pa ang mangulo niini. Mora’g hopeless na nga malimpiyo pa ang maong ahensiya.
Ug niining giingong dakong reporma, padayon na kahang maglawig ang maong ahensiya ngadto sa kabag-ohan?