Daghan na usab karon ang gibati og kabalaka sa pagsulod sa unang bulan sa Enero niining tuiga kalit na usab nga miusbaw ang presyo sa matag litro sa produktong petrolyo.
Ang kabalaka nga niining pag-usbaw sa presyo sa matag litro sa produktong petrolyo maoy himoon sa mga drayber sa mga sakyanang pasaheroan ang pagpangayo na usab og usbaw sa minimum nga plitehan.
Matud pa nila nga dako kaayo ang epekto sa katawhan sa higayon nga adunay ipatumang mga pagpa-umento sa minimum nga plitihan kay mosunod man gilayon ang pag-usbaw sa mga nag-unang palaliton.
Naglakip sa mga nag-unang palaliton nga makaepekto sa mga kabus sa higayon nga usbawan ang presyo mao ang bugas ug mga linatang pagkaon sama sa sardinas, asukar, mantika ug uban pa.
Ang bugas nga hilabihan ang pag-usbaw sa iyang presyo sa matag kilo sa naghinapos ang tuig 2012 wala pa gayod mokunhod hangtod niining panahona nga hilabihang naapektohan sa nagsunod-sunod nga duha ka dagkong katalagman nga linog ug bagyo nga Yolanda.
Dugang nga mga kabalaka kay gawas nga miusbaw ang presyo sa matag kilo sa bugas maoy namatikdan nga miusbaw usab ang presyo sa mga utanon ug uban pa nga mga produkto sa kaumahan nga giingong naapektohan usab sa nasinati nga katugnaw.
Daan na nga nag-antus ang katawhan sa hilabihan ka mahal sa isda nga gibaligya sa kamerkadohan nga naapektohan sa bagyong Yolanda ug gitiwasan pa gayod sa kanunay nga pagkulyada nga nakapasamot sa pagnihit sa isda.
Matud pa nila nga gilauman na lamang karon sa katawhan nga ang kagamhanan mohimo usab og mga lakang nga kapugngan ang dugang pa nga pagpatuman sa presyo sa matag litro sa produktong petrolyo kay kun dili mosamot gayod nga masugamak ang pag-antus sa hilabihan na kamahal sa presyo sa mga nag-unang palaliton.