Head guard sa USC main gahi

Belib ko sa ka-estrikto sa University of San Carlos (USC) Main mo-implementar sa ilang balaud alang sa seguridad sa ilang estudyante ug mga empleyado. Apan di ko belib sa ilang head guard, kinsa kulang sa hustong paminsar ug diskarte.

Tiaw bay, bisa’g akong sakyanan naka-parking na sulod sa USC quadrangle ug gisultian ko nga may university car sticker kini, gibabagan lang gihapon ko niya. Bisa’g nagpaila na ko niya nga akong misis, empleyada sa maong unibersidad, diin kanhi dinhi pud ko nagtrabaho gialihan lang gihapon ko. Gipangayoan pa ko’g ID. Gitagaan nako sa akong driver’s license. Wa gihapon gi-honor. Kay iyang gusto USC ID. Haskang gahia. Gahi kaayo pasabton. Nakapangutana na lang hinuon ko sa akong kaugalingon kun husto ba kaha’g pangutok ning tawhana, no? Labad man ika-estorya!

Sa Entrance gate pa lang, tsek-apon na sa guwardiya ang sakyanan nga mosulod ug tan-awon kun aduna bay university sticker nga gipapilit sa atubangang wind shield. No sticker, No Entry! Nga sa ato pa, kay naka-parking na man akong sakyanan sa sulod, miagi na kini sa ilang checkpoint. Kun agrabiyado ang maong head guard, kinsa di makatuo nga sa kapobre sa akong nawong, nganong makapanag-iya’g sakyanan, unya pirme pa gyung pasudlon sa eskuylahan, ang iya untang mga guwardiya maoy giimbestigar pag-ayo. Buwahan, masayod siya sa tinuod. Ning gibuhat niya, klaro kaayo nga kulang ang iyang superbisyon sa tibuok balwarte nga nahisakop sa iyang responsibilidad.

Tiaw bay, gikan 1st sem, 1973 hangtod karon, tigsudlan ko sa USC Main. Pero adtong gabhiona ra ko niya nakita. Kulang kaayo siya sa familiarization. Menus pa gyu’g pensamiento! Di kaha maalkanse ang USC niya, no? Hinuon nakasulod ra gihapon ko tapos sa among lalis.