Alpine para drug test

Mga lokal nga kagamhanan mahimo na nga makaangkon og brand new nga mga heavy equipment aron gamiton sa bisan unsang pagpalambo sa ilang mga hurisdiksiyon.

Ang XCMG D’Limitless Vehicle Ventures Corp. mibukas sa ilang tindahan og nagkadaiyang mga heavy equipment nga brand new apan sa kubos nga presyo, sama sa wheel loader, single drum, compactor vibratory, dumptruck, backhoe loader, asphalt concrete paver, boom truck, pneumatic roller, excavator ug uban pa.

Kining klaseha sa mga mga heavy equipment ang gikinahanglan sa mga lungsod ug siyudad aron makagama og mga farm to market roads, pagpasemento ug pa-aspalto sa mga karsada, pag-ayo sa mga suga sa kadalanan, paghakot og mga balas ug graba alang sa mga public works niini.

Kining maong tindahan nga anaa mahimutang sa Juan Luna Ave., atbang sa Radisson Blu ug SM City Cebu maoy exclusive distributor sa mga produkto sa XCMG sa China, kang kansang mga produkto gigamit na sa mga nag-unang kanasuran sa kalibutan.

Sa pagduaw nako sa ilang tindahan atol sa ilang pagbukas niadtong Biyernes, nalipay ko nga naminaw nga adunay barato nga mga heavy equipment nga mahimong mapalit sa mga lungsod ug siyudad nga gustong makaangkon og brand new ug kalidad nga kagamitan alang sa ilang mga civil works.

Niadtong mga lungsod nga naigo sa bagyong Yolanda, mahimo usab kining magamit sa inyong tinguha pag-rehab sa inyong lugar.

* * *

Nahimo na hinuong unod sa mga estorya sa kapehan ug barberohan ang surprise drug test nga gihimo sa Cebu City Hall niadtong Miyerkules sa miaging semana.

Anang adlawa nga gihimo sa Cebu City Office for Substance Abuse and Prevention (COSAP) ang surprise drug test, ang tanang miyembro sa Konseho sa siyudad nagpa-drug test.

Apan imbes moapil si Mayor Mike Rama sa surprise drug test, saba na hinuon kaayo siya ug nangugat kay ngano kunong pugson man siya og pa-drug test nga wala man kunoy makabuot kaniya.

Sa balita sa The Freeman (petsa 24 sa Enero), si Mike nagkanayon: “Dili ko lagi magpabuot nga sila ang mosulti nako. Ako ang magbuot. Ngano sila man magbuot tawon, maghuwat sila kay di man ko mahadlok ana. Ayaw sila padektara nako. Dili sila maoy dektar sa mayor, sorry. Kay makaseguro diay mo nga wa ko magpa-testing? Aw wa ta kahibalo.”

Apan sa pagkasunod adlaw na, adlaw’ng Huwebes miadto si rama sa conference room sa bise mayor ug nagpa-drug test sa pagka-alas 2:30 sa hapon, sumala sa balita.

* * *

Tinuod nga wala gyu’y makabuot sa mayor unsay iyang buhaton tungod kay siya’y amahan sa siyudad.

Uyon ko sa iyang pagbarog nganong but-an man siya sa mga kaubanan niyang konsehal nga mga mayoriya sakop sa Bando Osmeña Pundok Kauswagan (BOPK).

Pero taym pa ra gud, dili ba surprise man to ang drug test sa COSAP sumala sa request sa mga sakop sa konseho nga gipaagi og resolusyon?

Samtang angay respetohan ang mayor sa iyang baruganan ug dili siya angay dektahan, maayo usab segurong ipasabot niya ngadto sa iyang mga botante nganong dili naman lang gyud siya mo-uban sa iyang mga kaubanan nga mga opisyal sa siyudad pag-apil sa surprise drug test.

Kun wala’y gikahadlokan si Mike sa mahimong resulta sa surprise drug test, simple ra kaayo ang pagpangihi aron testingan kun wala ba kini residue sa ilegal nga drugas sama sa shabu.

Wala may nagtuo nga adik ang mayor. Apan kining surprise drug test gihimo kini aron pagsipong sa mga adik-adik nga mga opisyal ug trabahante sa lokal nga kagamhanan, sumala sa gimbut-an sa Comprehensive Dangerous Drugs Act.

Kay si Mike man ang amahan sa siyudad, angay unta nga siya pa ang mag-una-una pagpa-testing sa iyang ihi sa surprise drug test. Ug aron mosunod usab ang uban sa pagpa-drug test.

Simple ra kaayo ang pagpangihi, wala’y laway nga angay usikan pagyawyaw kinsay magbuot.

Mao man bitaw’ng gitawag kini og surprise drug test kay aron wala’y maka-eskapo kun makit-an nga positibo. Kay kun sultihan pa ang mga tawo nga adunay drug test, sayon ra man ang pagpapas niini. Nahinumdom hinuon ko sa komedya sa akong higala nga kanunay’ng maka-eskapo kaniadto sa drug test sa LTO. Moinom ra gyud siya og Alpine kay menus 24-oras tangtang (kuno) ang residue sa drugas sa ihi ug dugo. Ambot unsay naa sa Alpine.

Mao nga kun dili surpresahon ang Cebu City Hall sa drug test, hayan mokalit og kahalin ang mga de latang Alpine sa kasilinganang tindahan niini ug wala’y silbe ang drug test kay pulos negatibo ang resulta.