Ang Dios Miingon

ENERO 26, 2014: Ikatulong Domingo sulod sa tuig (National Bible Sunday)

Mga Pagbasa: Is. 9;1-4/Sal. 27/1 Cor. 1;10-13,17/Mt. 4;12-23

Diha sa pagrisgo

Ang gibuhat sa mga unang tinun-an ni Jesus usa ka dakong risgo. Risgo tungod kay ang bag-ong matang sa kinabuhi nga ilang pagasubayon ang wala man nila masinati. Mananagat sila og mga isda ug ang pagsangyaw sa Maayong Balita layo ra kaayo sa ilang naandan.

Dugang pa, kaniadto ang kinabuhing ekonomikanhon nagasukad gyud diha sa imong kalambigitan sa imong pamilya. Sa laktud ang panagat nila usa ka family business. Kun sila magpalayo sa ilang pamilya nga maoy ilang kusog ug gisaligan sama ra nga ilang gisugal ang ilang kaugmaon.

Ang ilang pagbiya sa ilang mga pukot ug sakayan usa ka mahinungdanong ritwal sa pagpadayag sa ilang willingness nga mohalad sa ilang kaugalingon. Ingon ini usab ang atong pagsunod kang Kristo Jesus.

Nagkinahanglan kini og pagkamanggihatagon sa atong bahin dungan ang pagtuo ug pagsalig nga ang Dios uban kanato sa kanunay.