Halad Pasalamat

Liwas na sa Piyesta Senyor sa Sugbo apan makapahimus ka sa dakong piyesta sa libreng mga pangalagad tibuok adlaw karong Sabado, Enero 25, 2014, atol sa Halad Pasalamat sa Jose R. Gullas Halad Foundation. Naa na sa iyang ikaupat nga sunudsunod nga tuig, ang talagsaong kalihokan ipahigayon sa Gullas Medical Center, nga nahimutang duol sa utlanan sa Banilad, Dakbayan sa Sugbo ug Banilad, Dakbayan sa Mandaue.

Gipaabot nga dugukon sa labing daghan ang libreng konsultasyon ug libreng tambal alang sa mga pasyenteng bata ug dagko; libreng limpiyo, pasta ug ibot sa ngipon (may ipahigayon nga pre-screening tibuok semana karong semanaha sa Gullas College of Dentistry); ug libre nga visual ug cataract examination ug libreng reading eyeglasses.

* * *

Libreng pap smear alang sa kababayen-an, libreng tuli sa kabataan, libreng ECG, libreng bakuna sa tetanus toxoid, libreng purga ug libreng laboratory services sama sa blood testing alang sa uric acid level ug cholesterol level, ug random blood sugar.

May ipahigayon sang donasyon sa dugo alang sa mga biktima sa katalagman ug emerhensiya. Atubangan sa dakong kakuwang sa suplay sa dugo sa Sugbo ug Central Visayas, hinaot nga di imakuli sa himsog nga kalalakin-an ug kababayen-an ang paghatag sa gasa sa kinabuhi. Libre sang foot reflexology ug acupressure. Bisan mga iro ug iring makapahimus og libreng bakuna ug pagpurga.

* * *

Mass feeding alang sa kabataan ang pasiugdahan sa The FREEMAN Foundation ug gift-giving sa mga bata ug dagko ang himuon sa Bantay Bata 163. Libre sab ang seminars alang sa herbal medicine preparation, pag-andam sa income tax return, drug awareness, paghimo og detergent ug liquid dishwashing, psychological first aid.

Libreng tupi, libreng masahe ug libreng pag-ayo sa cellphones ang itanyag sa Technical Education and Skills Development Authority ug libreng pag-ayo sa computers ang serbisyo sa boluntaryong si Adrian Guanzon. May one-stop shop sa mga pangalagad sa Pag-Ibig Fund, Land Transportation Office, National Statistics Office, National Bureau of Investigation ug Philippine Health Insurance.

* * *

Motabang sab sa mga way trabaho ug mga nangambisyon og mas maayong panginabuhi sa pagpangita og kahigayonan sa trabaho ang Public Employment Services Office sa University of the Visayas pinaagi sa ilang job search help desk.

Ang unang mangabot maoy unang maalagaran sa Halad Pasalamat nga gipasiugdahan sud na ron sa upat ka tuig ni Dr. Jose "Sir Dodong" Gullas. Kinsa nakahukom nga inay magkumbira sa sumad sa iyang adlaw’ng natawhan matag Pebrero 1 motanyag siya og piyesta sa libreng mga pangalagad alang sa labing kabos ug labing nagkinahanglan nga mga Sugbuanon. Ang tinuig nga kalihokan giabagan sa Grand Halad sa Kapamilya sa DYAB Abante Pa, Bisaya!, DYLS For Life! ug ABS-CBN Cebu.

* * *

Email: [email protected].